««Խաղաղության խաչմերուկին» անդրադարձն անկասկած կատարվել է Միջին միջանցքի համատեքստում»․ Հակոբ Բադալյան

Քաղաքական մեկնաբան Հակոբ Բադալյանը թելեգրամյան գրառմամբ անդրադարձել է Նիկոլ Փաշինյանի, Անտոնիու Կոշտայի և Ուրսուլա Ֆոն դեր Լայենի հանդիպմանը․ «Աայս հանդիպման մասին ըստ էության․ Այստեղ կա մի պարբերություն՝ «անդրադարձ է կատարվել ՀՀ Կառավարության «Խաղաղության խաչմերուկ» նախագծին: Անտոնիու Կոշտան և Ուրսուլա Ֆոն դեր Լայենը ողջունել են նախագիծը և կարևորել տարածաշրջանային հաղորդակցության ուղիների ապաշրջափակումը»:

Ինչո՞ւ է «անդրադարձ» կատարվել, եթե այդ «Խաչմերուկ» ծրագիրը Նիկոլ Փաշինյանը շատ շատ վաղուց է ներկայացրել բոլորին էլ, այդ թվում ԵՄ-ին, ֆոն դեր Լայենին ու Անտոնիո Կոշտային:

Եթե «անդրադարձ է կատարվում», ապա դա նշանակում է, որ քննարկվում է որևէ առարկայական բան՝ կապված այդ հաղորդակցության ուղիների ապաշրջափակման հետ: Ընդ որում, թերևս սրա մասին վկայում է և այն, որ նախօրեին Բրյուսել է մեկնել ու Եվրահանձնակատար Կալասի հետ հանդիպել Արարատ Միրզոյանը, որը Լյուքսեմբուրգում մասնակցում էր ԵԽ նախարարական կոմիտեի նիստին:

Ես այդ առնչությամբ երեկ առավոտյան արտահայտվեցի, որ Միրզոյանի այցն ըստ ամենայնի պայմանավորված է ինչ որ ճշգրտումների անհրաժեշտությամբ և բարձր մակարդակի հանդիպումների նախապատրաստությամբ: Փաստորեն, նախապատրաստվել է հանդիպումը Ալբանիայում՝ Եվրոպական քաղաքական համայնք նախաձեռնության գագաթնաժողովի շրջանակում:

Վերստին հիշեցնեմ նաև Կալասի Բաքու այցը, Կենտրոնական Ասիայի հետ կապի մասին և Ադրբեջանի դերի մասին նրա հայտարարությունները, և ապրիլի սկզբին ֆոն դեր Լայենի հայտարարությունները Միջին միջանցքով «անխոչընդոտ սահմանների» մասին:

«Խաղաղության խաչմերուկին» անդրադարձը կատարվել է անկասկած հենց այդ համատեքստում: Թե որքանով են համադրված Երևանի ու Բրյուսելի պատկերացումներն ու մոտեցումները այդ «անդրադարձի» շրջանակում, եզրակացնելու համար դեռևս չկա բավարար տեղեկատվություն»։