«Մեզնից ոչ ոք պատասխանատվությունից չի խուսափում»․ Սեյրան Օհանյան

«Ռոբերտ Քոչարյանի հետ հանդիպումների ժամանակ մեր զրույցների հիմնական մասը վերաբերում են մեր ծրագրերին, գործունեությանը և, հատկապես, «Հայաստան» խմաբկացության շրջանակներում իրականացվող գործընթացներին։ Անձնական հարցերի շուրջ մենք քիչ ենք խոսում»,- խորհրդարանական ճեպազրույցի ժամանակ ասաց «Հայաստան» խմբակցության ղեկավար Սեյրան Օհանյանը՝ անդրադառնալով հարցին, թե արդյո՞ք երբևէ հարցերել է երկրորդ նախագահին՝ ունեցվածքը հալալ քրտինքո՞վ է ձեռք բերել։ Օհանյանը, խոսելով երկրորդ նախագահի և նրա ընտանիքի վերաբերյալ ապօրինի գույքի բռնագանձման գործընթացից, ասաց․ «Թե ինչպիսի գործընթացներ կան հակակոռուպցիոն և դատական ոլորտում, տեսանելի են բոլորի համար, և դրանց եզրափակման, պատասխանատվության հարցը իրավապահների խնդիրներից է։ Այդ հարցերին պարոն Քոչարյանը մեկ անգամ չէ, որ պատասխանել է։ Դատաիրավական գործընթացները ընթանում են, և եթե այնտեղ ինչ-որ խախտումներ կան, թող օրինական որոշումներ ընդունեն։ Մեզնից ոչ ոք պատասխանատվությունից չի խուսափում։ Դատական համակարգը անաչառ է, անկախ է և այդ ամենը նա պետք է դրևորի։ Թեպետ վերջին տարիներին այնտեղ շատ խնդիրներ կան, որոնց պատասխանները չեն տրվում»,- ասաց Օհանյանը։