«Ռուսաստանում՝ «կուռկուռի ձագ», Ալբանիայում՝ ժպիտը տեղը»․ Արամ Մանուկյան

«Որոշ տեղերում, ինչպիսին, օրինակ, Ռուսաստանն է, Նիկոլ Փաշինյանն իրեն զգում է «կուռկուռի ձագի», «թրջված հավի» նման, իսկ Ալբանիայում հարազատ միջավայրում էր՝ տրամադրությունը, ժպիտը տեղն էին»,- «Նյուզ»-ի հետ զրույցում այս կարծիքը հայտնեց ՀԱԿ փոխնախագահ Արամ Մանուկյանը՝ անդրադառնալով Նիկոլ Փաշինյանի արտասահմանյան այցերին։

«Ակնհայտ է, սա է իր միջավայրը, և իրեն սնուցող աղբյուրները սա են գովազդում, ոգևորում, ուսին թփթփացնում, դրա համար էլ ինքն այստեղ իրեն շատ լավ է զգում։ Եվ հավանաբար նրանք էլ խոստացել են, որ կմնա իշանության։ Իսկ նրա իշխանության մնալու լավագույն հույսը, տարօրինակ է, բայց Ալիևն ու Էրդողանն են։ Դա բացատրություն ունի․ Էրդողանի և Ալիևի համար Փաշինյանը գտնված կերպար է, գտնված հերոս է, որը քայլ առ քայլ, փոքր, բայց անընդհատ գործողություններով տալիս է Հայաստանը։ Եվ Հայաստանի ապապետականացումը, պետականության կազմալուծումը, կազմաքանդումը այդ երեք միավորների շահերի համընկման կետում են․ Էրդողանի, Ալիևի և Փաշինյանի շահերի համընկնելու կիզակետը հենց այդտեղ է։ Դա ակնհայտ ծրագիր է, և իրենք համատեղ, սիրալիր, առանց կոնֆլիկտների այդ ծրագիրն իրականացնում են»,- ընդգծեց Մանուկյանը։