«Ութ հայկական գյուղերի հանձնման գործընթաց է նախաձեռնել գործող ռեժիմը». «ՀայաՔվե»

«ՀայաՔվե»-ի թելեգրամյան գրառումը. «Ութ հայկական գյուղերի հանձնման գործընթացով, որը նախաձեռնել է գործող քաղաքական ռեժիմը, նպատակ է դրվել Հայաստանը դնելու էլ ավելի ծանր տրանսպորտային շրջափակման մեջ։

•Գաղտնիք չէ՝ Տիգրանաշենը գերկարևոր է, քանի որ այդտեղով է անցնում մեր հիմնական ճանապարհը դեպի հարավ, իսկ Վրաստանին կապող մեր ճանապարհն անցնում է Տավուշով։ Այսինքն՝ այս երկու ճանապարհները կհայտնվեն արգելափակման վտանգի առաջ։

Վրաստանին կապող երկաթգիծը ևս անցնում է հանձնվելիք գյուղերի մոտակայքով, ադրբեջանցիները հայտնվելու են երկաթգծին շատ մոտ, և եթե նույնիսկ շրջանցիկ ճանապարհ կառուցենք, ինչպես հիմա փորձում են մեզ մատուցել, այն հայտնվելու է թշնամու կրակային վերահսկողության ներքո։ Տեղի է ունենում Հայաստանի մասնատման, քայքայման և ոչնչացման գործընթաց, սա նոր կապիտուլյացիա է։

Այն արվում է միակողմանիորեն, և այստեղ ներկայացված օրակարգում միայն Ադրբեջանի և Թուրքիայի շահերն են։ Ցավոք սրտի, գործող իշխանությունն այն իրականացնում է ոչ թե ճնշման տակ, այլ մեծագույն հաճույքով։ Նրանք հենց այդ նպատակով էլ բերվել են իշխանության՝ հողերը հանձնելու, երկիրը քանդելու և քայքայելու, և այդ գործը լավ են անում»: