«Ծառայությունից խուսափած անձինք առաջ են քաշում օրենսդրական նախաձեռնություններ». Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «ՔՊ-ական պատգամավոր Հայկ Սարգսյանի ներկայացրած նախագիծը, որը վերաբերում է զինվորական ծառայության կարգավորման փոփոխություններին, մայիսի 22-ին հաստատվեց ՀՀ կառավարությունում։ Ըստ Պաշտպանության նախարար Սուրեն Պապիկյանի՝ նախատեսվում է սահմանել կրճատ ժամկետով ծառայություն՝ մեկ ամսվա դեպքում՝ 24 մլն դրամ վճարի դիմաց, իսկ չորս ամսվա դեպքում՝ 18 մլն դրամով։ Կառավարության որոշումներով սահմանվելու է յուրաքանչյուր զորակոչի համար կրճատ ծառայության դիմումների առավելագույն քանակը։ Այս օրենքով, պարտադիր զինծառայության տարիքային սահմանն էլ բարձրացվում է մինչև 32 տարի։
Հշեցնեմ, որ օրինագիծը քննարկվում է մի կառավարությունում, որի ղեկավարը՝ վարչապետ Փաշինյանը, հայտարարել էր, որ իրենք բոլորով տգետ են և 7 տարի նույն դասարանում են մնացել:
Նշեմ նաև, որ կառավարության անդամների զգալի մասը՝ տարբեր պատճառներով, ծառայությունից խուսափած անձինք են։ Այժմ այդ նույն մարդիկ առաջ են քաշում օրենսդրական նախաձեռնություններ՝ իբր բանակը համալրելու և անվտանգության խնդիրները լուծելու նպատակով։
Հարգելի տգետներ, սա աղամանների կամ ծխելու մասին օրենք չէ, որի ձախողման դեպքում պարզապես քմծիծաղով կանցնենք վրայով, սա ազգային անվտանգությանը վերաբերող չափազանց լուրջ հարց է, և դեռ պարզ չէ, այն ավելի շատ կվնասի աշխատելով, թե չաշխատելով»: