Նորք Մարաշ ԲԿ-ն քաղաքացու մահվանից 26 օր անց է միայն «ցավակցություն» հայտնում

Երեկ ՄԱՄՈՒԼ․am-ն անդրադարձել էր ողբերգական միջադեպի, երբ, համաձայն Դատախազությանն ուղղված հաղորդման, «Նորք Մարաշ ԲԿ-ում բուժանձնակազմի՝ կյանքի համար վտանգավոր գործողությունների, իսկ ծայրահեղ ծանր վիճակում՝ անգործության հետևանքով, վիրահատությունից օրեր անց, արագ ապաքինվող քաղաքացի է մահացել»։ Ընդ որում, հաղորդման մեջ մանրամասն նկարագրված են միջադեպի մասնակից բժիշկներ՝ Գագիկ Հեբոյանի, Քրիստինե Պողոսյանի, Հովհաննես Ավդալյանի, Գագիկ Հապետյանի, Էդուարդ Պետրոսյանի, Արա Անանյանի գործողությունները։
Չնայած այն հանգամանքին, որ նյութը կազմված է Դատախազություն ներկայացված հաղորդման տեքստի հիման վրա, այնուամենայնիվ, Նորք Մարաշ ԲԿ-ն, նյութի հրապարակումից 20 րոպե անց, ԲԿ-ի ֆեյսբուքյան էջում հրապարակել է անստորագիր մի գրառում, որով մեղադրում է խմբագրությանը զրպարտության մեջ (ինչպե՞ս է հնարավոր 20 րոպեում ուսումնասիրել Դատախազությանն ուղղված 8 էջ հաղորդումը, հարցաքննել մասնակից բժիշկներին, քույրերին, վարչական աշխատակիցներին, պարզել որ բոլորն «անմեղ» են, գրել պարզաբանումը և հրապարակել ֆեյսբուքում)։
Սակայն, այստեղ հատկանշականն այլ հանգամանք է։ Խմբագրությունը մահացած քաղաքացու ընտանիքից հետաքրքրվել է, արդյո՞ք Նորք Մարաշ ԲԿ-ն կամ բուժանձնակազմից որևէ մեկը, միջադեպից հետո գրավոր, կամ՝ բանավոր հայտնել է ցավակցություն։

Որքան էլ որ տարօրինակ է, բայց նաև սպասելի, մահացած քաղաքացու ընտանիքի անդամները հայտնեցին, որ բժիշկներից որևէ մեկը մահացած քաղաքացու ընտանիքից կամ հարազատներից որևէ անդամի հետ կապ չի՛ հաստատել, չի՛ ցավակցել։ Պաշտոնական ցավակցություն չի հայտնել նաև Նորք Մարաշ ԲԿ-ն (խմբագրությունն ուսումնասիրել է ԲԿ-ի պաշտոնական կայքը, սոցցանցերի էջերը)։
Այսպիսով, քաղաքացու մահվանից 26 օր անց, երբ ՄԱՄՈՒԼ․am լրատվականն անդրադարձավ ողբերգական միջադեպին, Նորք Մարաշ ԲԿ-ն 20 րոպե անց հանդես եկավ ինքնաարդարացման, ինքնագովաբանական 5 պարբերություն ծավալով հայտարարությամբ, որի ավարտական պարբերությունններում հպանցիկ մեկ նախադասությամբ «ցավակցություն» հայտնեց մահացած քաղաքացու ընտանիքի անդամներին։ Սակայն բժշկական սխալների, անգործության և մահվան վկայականում կեղծ տվյալներ լրացնելու մասին՝ ոչ մի բառ։

Փաստացի, եթե չլիներ խմբագրության անդրադարձը ողբերգական այս միջադեպին, Նորք Մարաշ ԲԿ-ն «ցավակցական» որևէ խոսք մահացած քաղաքացու հարազատներին չէր էլ գրի։

Ավելին։ Մահացած քաղաքացու ընտանիքից տեղեկացանք, որ նամակ է ուղարկվել Նորք Մարաշ ԲԿ-ին, որտեղ կոնկրետ պահանջ է ներկայացվել հանդես գալ հրապարակային հայտարարությամբ, սակայն, որևէ արձագանք ԲԿ տնօրինության կողմից չի հետևել, անգամ ցավակցություն չի հայտնվել ո՛չ գրավոր, ո՛չ բանավոր։

Հարգելի՛ ընթերցող,

Տեղեկացնում ենք, որ ողբերգական այս միջադեպի մասին նյութի հրապարակումից հետո, խմբագրությունը ստացել է բազմաթիվ զանգեր, նամակներ՝ Նորք Մարաշ ԲԿ-ի, վերոնշյալ բժիշկների, բուժանձնակազմի և վարչական աշխատակիցների գործողությունների, կամ անգործության հետևանքով տեղի ունեցած ողբերգական նմանատիպ դեպքերի մասին։ Քաղաքացիները խմբագրություն են ուղարկել են նաև նյութում նշված բժիշկների և ԲԿ-ի վարչական մի շարք աշխատակիցների գործողությունները պատկերող տեսա և ձայնագրված նյութեր, որոնցում արձանագրված են վերջինների ոչ մասնագիտական վարքագծային պահվածքի դրվագներ։

Խմբագրությունը սկսել է լրագրողական հետաքննություն՝ Նորք Մարաշ ԲԿ-ի և բուժանձնակազմի գործողությունների վերաբերյալ (ինչպես նաև այլ աշխատակիցների), և սումնասիրություններից հետո հանդես կգա հրապարակումներով։

Իսկ արդեն հրապարակված միջադեպի մասով, խմբագրությունը հարցումներ է ուղարկել ՀՀ Գլխավոր դատախազություն, Քննչական կոմիտե ու գործի ընթացքի մասին կլինեն նոր հրապարակումներ։

ՈՒՇԱԴՐՈՒԹՅՈՒՆ
Եթե Դուք (Ձեր հարազատները) ևս տուժել եք վերոնշյալ բժիշկների, կամ Նորք Մարաշ ԲԿ-ի այլ աշխատակիցների գործողություններից, կարող եք զանգահարել խմբագրության լրահավաք հեռախոսահամարին (010 55 20 59), կամ գրել (ուղարկել ձայնագրություններ, տեսագրություններ, այլ նյութեր) [email protected] լրահավաք հասցեին, կամ Ֆեյսբուքի էջին։
Խմբագրությունը երաշխավորում է տեղեկատվություն տրամադրող անձի գաղտնիությունը։