«Ասում եք՝ չեք մոռացե՞լ, չեք ուրացե՞լ»․ Գեղամ Նազարյան

ԱԺ պատգամավոր Գեղամ Նազարյանի ֆեյսբուքյան գրառումը․ «Կար մի սերունդ, մի ոսկե սերունդ, որ վերջին զանգից պատերազմ գնաց, կռվեց, կյանքը, առողջությունը զոհեց հանուն մեզ, հանուն Հայաստանի։ Կար մի սերունդ, որ վերջին զանգը կորոնավիրուսային խելացնորության պատճառով ծածուկ էր անում։
Ինչքա՞ն հեշտ մոռացաք այդ սերնդի մասին, որքա՞ն հեշտ ուրացաք նրանց անձնազոհությունը ու այդպես էլ չսովորեցիք նրանց տված դասերը։
Ասում եք՝ չեք մոռացե՞լ։ Եթե մոռացած չլինեիք նման լպիրշ վերջին զանգ չէիք անի, ավտոմեքենաներից դուրս ցցված աղջիկներ ու տղաներ չէին լինի... Ասում եք՝ չեք ուրացե՞լ։ Իսկ եթե չեք ուրացել, ապա միթե՞ նման ցոփ ու շվայտ ձևերով են վերջին զանգ անում։ Շրջանավարտների ծնողներ, ձեզ ինչ եղավ, որ ձեր երեխաներին չեք կարողանում սթափեցնել։ Մի՞թե մեր տղերքը զոհվել են, որ վերջին զանգին երեխաներ մահանան ավտովթարի կամ կվադրոցիկլի վթարի հետեւանքով։
Ասում եք դասե՞րը չեք մոռացել։ Որ մոռացած չլինեիք ոչ միայն վերջին զանգը համեստ կանեիք, այլ ձեր երեխաների հարսանիքներին սալյուտներ չէիք խփի, մարզադաշտեր և մարզահամերգային համալիրներ չէիք վարձակալի, հարսանիք անելու համար Իջևանից Գավառ կամ Վայքից Արմավիր չէիք հասնի, ինչ է թե դահլիճը մոդայիկ է, հերոսների ծնողներին ձեր կեղտոտ քաղաքական խաղերի մեջ չէիք ներքաշի ու նրանց հարվածի տակ չէիք դնի։
Այս ի՞նչ եք անում մեր երկրի ու պետության հետ, մեր տղերքի հիշատակի հետ։ Պատերազմում շատերն են պարտվել, բայց դուրս են եկել հաղթանակած, քանի որ բանականության և բարոյականության նորմերը հետպատերազմական տասը, տասնհինգ տարիներին պահել են։ Լավ, մենք ի՞նչ ենք անում, մենք ո՞ւր ենք գնում»։