«Խցանումներից խուսափելու համար առաջարկում եմ նախարարությունները տեղաբաշխել մարզերում»․ Սերգեյ Բագրատյան

ԱԺ ՔՊ խմբակցության պատգամավոր Սերգեյ Բագրատյանն ԱԺ-ում հայտարարությունների ժամին քննարկման ներկայացրեց Երևանը խցանումներից ազատելու, բեռնաթափելու ծրագիր։

«Առաջնահերթ է նախարարությունների տեղաբաշխումը հանրապետության ողջ տարածքով։ Մասնավորապես մինչև տարեվերջ կարելի է հատկապես երևանամերձ մարզերում տեղաբաշխել նախարարությունները։ Օրինակ՝ Տարածքային կառավարման ենթակառուցվածքների նախարարությունը կարելի է Կոտայքում տեղաբաշխել, Ֆինանսների նախարարությունը՝ Արագածոտնում, Պաշտպանության նախարարության ամենակարևոր գործառույթը Սյունիքում է, և ճիշտ կլինի, որ ՊՆ-ն ողջ կառուցվածքով տեղափոխվի Սյունիք։ Շրջակա միջավայրի նախարարությունը Սևանա լճի շրջակայքում պետք է տեղաբաշխել, ԿԳՄՍ նախարարության համար լավագույն տեղը Շիրակն է, Էկոնոմիկայի նախարարությունն Արմավիրում, աշխատանքի և սոցիալական հարցերի նախարարությունը՝ Տավուշի, Առողջապահության նախարարությունն էլ՝ Լոռու մարզում պետք է տեղաբաշխել»,- նշեց պատգամավորը։

Բագրատյանի կարծիքով՝ մայրաքաղաքը բեռնաթափելու համար անհրաժեշտ է նաև բարձրագույն ուսումնական բոլոր հաստատությունները տեղափոխել Ակադեմիական քաղաք, անպայմանորեն Երևանից հանել նաև խոշոր առևտրի կենտրոնները։