«Չենք աջակցի, եթե վարչապետի պաշտոնում առաջադրվի Սերժ Սարգսյանի թեկնածությունը»․ Հովիկ Աղազարյան

«Մենք չենք միանա Սերժ Սարգսյանի թիմի առաջարկին։ Մենք հայտարարել ենք, որ եթե նույնիսկ «Պատիվ ունեմ» խմբակցությունը կամ «Հայաստան» դաշինքն առաջադրեին Էդմոն Մարուքյանի թեկնածությունը, մենք, միևնույն է, չէինք միանա»,- այս մասին «Պոլիտիկ»-ի հետ զրույցում նշեց նախկին ՔՊ-ական պատգամավոր Հովիկ Աղազարյանը՝ անդրադառնալով դիտարկմանը, որ «Պատիվ ունեմ»-ը մերժել է վարչապետի պաշտոնում Էդմոն Մարուքյանի թեկնածությունը՝ ասելով՝ նա Նիկոլ 2 է, և Սերժ Սարգսյանն ակնարկել է, որ իրենք կառաջադրեն վարչապետի թեկնածու։

Հարցին՝ եթե «Պատիվ ունեմ»-ն առաջադրի Սերժ Սարգսյանի թեկնածությունը, կաջակցե՞ն նրան, թե՞ ոչ, Աղազարյանը պատասխանեց․ «Ո՛չ, Սերժ Սարգսյան - Ռոբերտ Քոչարյան առանցքի որևէ ուժի հետ մենք չենք համագործակցի, բայց «Պատիվ ունեմ» խմբակցությունը և «Հայաստան» դաշինքը եթե պետականության հենքի վրա շարժվեն և աջակցեն մեր թեկնածուին, ապա մեր թեկնածուն պատրաստ է իրենց հետ բանակցելու։
Հակառակ դեպքում ստացվում է, որ «Հայաստան» դաշինքն ուզում էր իշխանությունը փոխել Բագրատ Գալստանյանի կամ Վազգեն Մանուկյանի դեմքով, որպեսզի իրավիճակ փոխվեր և գնայինք «հին ու բարի ժամանակնե՞րը»․ դա մեզ համար անընդունելի է»։