«Ծաղրանք է, որ ՀՀ տարածքներն ու ինքնիշխանությունը հանձնածները խոսում են այդ նույն արժեքներից»․ Րաֆֆի Հովհաննիսյան

«Ժառանգություն» կուսակցության առաջնորդ Րաֆֆի Հովհաննիսյանին, ինչպես նաև տասնյակ քաղաքացիների, թույլ չէին տվել այցելել Սարդարապատի հուշահամալիր, քանի դեռ այնտեղ պաշտոնական միջոցառում էր՝ վարչապետի և կառավարության անդամների մասնակությամբ։
Լրագրողների հետ զրույցում Րաֆֆի Հովհաննիսյանը անդրադարձավ Փաշինյանի ուղերձին՝ մասնավորապես այն մտքին, թե «մեր ժողովուրդն այլևս հայրենիք փնտրելու կարիք չունի, հայրենիքը գտնված է։ Այսօր մենք ավելի պետություն ենք, քան՝ երբևէ, ավելի ինքնիշխան ենք, քան՝ երբևէ»։ Հովհաննիսյանի խոսքով ծաղրանք է, որ նրանք, ովքեր հանձնել են ՀՀ տարածքները, ինքնիշխանությունը, խոսում են այդ նույն արժեքներից․ «Եթե այսպես շարունակվի, հայոց պատմությունը ողբերգականորեն կկրկնվի։ Իրենք ոչ թե ինքնիշխանություն են բերում, այլ մեր պատմության ողբերգական կրկնումը և սա մեր ժողովուրդը պետք է բացառի»,- ասաց Հովհաննիսյանը՝ հավելելով, որ գործող իշխանությունները թքած ունեն Սարդարապատի ու մեր հերոսների վրա։