Պուտինը շնորհավորել է Բելառուսի, Ղազախստանի, Ղրղզստանի և Հայաստանի ղեկավարներին ԵԱՏՄ օրվա կապակցությամբ

ՌԴ նախագահ Վլադիմիր Պուտինը շնորհավորել է Բելառուսի, Ղազախստանի, Ղրղզստանի և Հայաստանի ղեկավարներին Եվրասիական տնտեսական միության (ԵԱՏՄ) օրվա կապակցությամբ։ Շնորհավորական ուղերձը հրապարակվել է Կրեմլի կայքում։
«Ընդունեք իմ ջերմ շնորհավորանքները Եվրասիական տնտեսական միության օրվա կապակցությամբ։ ԵԱՏՄ շրջանակներում ինտեգրացիոն գործընթացները զարգանում են շատ դինամիկ և արդյունավետ. ստեղծվել է ընդհանուր շուկա, որն ապահովում է ապրանքների, ծառայությունների, կապիտալի և աշխատուժի ազատ տեղաշարժ, իրականացվում է ազգային իրավական կարգավորման համակարգերի ներդաշնակեցում ամենակարևոր ոլորտներում, և հաջողությամբ իրականացվում են համատեղ տնտեսական և ենթակառուցվածքային նախագծեր», - ասվում է հայտարարության մեջ։
Պուտինը վստահություն է հայտնել, որ երկրներն այսուհետ ևս կշարունակեն զարգացնել կառուցողական բազմակողմ համագործակցություն՝ Եվրասիական տարածքում բարգավաճման և կայունության ապահովման նպատակով։