«Այս ամենը մեկ մեծ արշավի առանձին գործողություններ են»․ Կարեն Վրթանեսյան

Ռազմական վերլուծաբան Կարեն Վրթանեսյանը գրում է. «Եկեղեցու դեմ այսօրվա գրառումները, իշխանության քննադատներին «ոջիլ» անվանելը, «Կրթվելը նորաձև է» արշավը, հեծանվային արշավները, այդ բոլորը մեկ մեծ արշավի (ռազմական գործում դրան ասում են campaign) առանձին գործողություններ են (ռազմական եզրը՝ «օպերացիա»)։
Արշավն ունի 2 նպատակ. ա) Նիկոլի իշխանության վերարտադրությունը, բ) Ադրբեջանի և Թուրքիայի շահերի առաջխաղացումը։
Փորձենք հասկանալ, թե այդ գործողություններից որն ինչ նպատակ է հետապնդում, և ինչ կարգի մանրուքներ են հաշվի առնվում...
ԱՐԱՐ №1, ՈՐՈՒՄ ՆԻԿՈԼԸ ՍԱՓՐՎՈՒՄ Է
Հայկական մեդիադաշտը մոտ 2 շաբաթ քննարկում էր Նիկոլի թրաշվելը և թե ինչ թաքուն ուղերձներ է այն պարունակում։ Նամանավանդ, որ սափրվելուն հետևեցին «whatsapp-ով պաշտոնանկումները»։
Ըստ իս, սափրվելը շատ պրագմատիկ նպատակ էր հետապնդում. տեսե՛ք կից նկարները. մեկն արված է 2024-ի հոկտեմբերին, մյուսը՝ սափրվելուց հետո։
Նիկոլը տեսանելիորեն «երիտասարդացել» է (երևի թե՝ 5–7 տարով), ինչը, բնականաբար, նախընտրական փուլում հեչ ավելորդ չէ 50-ին մոտեցող գործչի համար։
Իսկ որպես լրացուցիչ բոնուս՝ զուգորդվելով պաշտոնանկությունների հետ, թրաշվելը մոտ 2 շաբաթով դարձավ օրակարգային թեմա, ստվերելով շատ ավելի կարևոր հարցեր, օրինակ՝ ի՞նչ իրավունքով է գործադիր իշխանության ղեկավարը պաշտոնանկ անում ԲԴԽ նախագահին, այն դեպքում, որ դատական իշխանությունը գործադիրի ենթակա չէ։
Պարզունա՞կ հնարք է։ Այո՛։ Հաշվարկվա՞ծ էր։ Այո՛, իդեալական հաշվարկ էր։ Արդյունավե՞տ էր։ Ավելի քան»։