«Կաթողիկոսը հրաժարական կտա ՌԴ ճնշմամբ․ այս ռեժիմի սրտի թեկնածուն Թուրքիայի քաղաքացի է»․ Հայկ Մարտիրոսյան

«Կաթողիկոսը պետք է հեռանա, որպեսզի Եկեղեցին փրկվի։ Ակնհայտ է, որ իր դեմ կան կոմպրոմատներ, ակնհայտ է, որ առանձին եպիսկոպոսների, արքեպիսկոպոսների դեմ ևս կան կոմպրոմատներ, և հիմա, երբ դրանք օգտագործվում են Եկեղեցին քանդելու համար, Եկեղեցին պետք է արագ ինքնամաքրվի, բայց դա չի արվում»,- «Եվրոմեդիա24»-ի եթերում այս կարծիքը հայտնեց քաղաքագետ Հայկ Մարտիրոսյանը։

Նրա դիտարկմամբ՝ ծավալվող գործընթացը հանգեցնելու է նրան, որ Եկեղեցու ներսում բարեփոխման չկամության, համառության հետևանքով Եկեղեցին ծնկի է բերվելու, և այդ պատասխանատվությունը մնալու է եկեղեցական առաջնորդների վրա։

«Ականատես կլինենք հրապարակվող կոմպրոմատների, և կվարկաբեկվի Եկեղեցին, որովհետև թույլ, «քաղցկեղային» օջախներին մատնացույց անելով՝ ռեժիմը կհասնի նրան, որ հանիրավի կվարկաբեկվի ամբողջ Եկեղեցին։

Ենթադրում եմ՝ կաթողիկոսը հրաժարական կտա ինչ-որ ժամանակ անց, և դա տեղի կունենա Ռուսաստանի ճնշման ներքո, որովհետև, կարծում եմ, այս ռեժիմը ձգտում է ստանալ թույլտվություն՝ գահընկեց անելու կաթողիկոսին և իր մարդուն տեղավորելու նրա փոխարեն, ընդ որում՝ կան լուրջ ենթադրություններ, որ այս ռեժիմի սրտի թեկնածուն արքեպիսկոպոս Սահակ Մաշալյանն է, որը Կոստանդնուպոլսի պատրիարքն է՝ Թուրքիայի քաղաքացի է և շատերի կարծիքով՝ Թուրքիայի գաղտնի ծառայությունների գործակալ է»,- ընդգծեց Մարտիրոսյանը։