«Նիկոլ Փաշինյանի՝ «քեռակնոջ» մասին գրառման հետ կապված վարույթ է նախաձեռնվել»․ Մարիամ Գալստյան

«Մենք լիազորությունների շրջանակում ունենք ԶԼՄ մոնիթորինգ, զանգվածային լրատվական մոնիթորինգի շրջանակներում մեզ ներկայացվել են Նիկոլ Փաշինյանի այն բոլոր հրապարակումները, որոնք կարող էին առերևույթ խախտման հիմք հանդիսանալ, մեկ դեպքով՝ քեռակնոջ մասին գրառման, արդեն ունենք հարուցված վարույթ»,- «Ֆակտոր»-ի հետ զրույցում ասաց Կոռուպցիայի կանխարգելման հանձնաժողովի նախագահի պաշտոնակատար Մարիամ Գալստյանը։ Նա նշեց, որ եթե հանձնաժողովը հրապարակում է խախտման եզրակացությունը, այդ դեպքում արդեն պաշտոնատար անձը ինքն իր սոցիալակն էջերում պետք է պարզաբանում տրամադրի խախտման առնչությամբ։

«Մեկ հրապարակումը չպետք է լինի հիմք՝ անձանց լիազորությունների դադարեցման համար, բայց քաղաքական պաշտոն զբաղեցնող անձինք պետք է քաղաքական պատասխանատվություն կրեն»,- ընդգծեց Գալստյանը և հայտնեց, որ Փաշինյանի մնացած գրառումների մասով ևս ունեն դիմում՝ փաստաբանների պալատի կողմից ստացված, որը ներկայում ուսումնասիրության առարկա է։ «Բոլոր հրապարակումների առնչությամբ Արա Զոհրաբյանը ներկայացրել էր դիմում»,- հավելեց նա։