«Վեհափառը պիտի գնահատական տա՝ նորմա՞լ է, որ արքեպիսկոպոսը շփվում է օտարերկրյա կառույցի հետ՝ ՀՀ-ում իշխանափոխության համար»․ Ռուբեն Ռուբինյան

«Եթե կա ընկալում, որ Եկեղեցու ղեկավարությունը մտել է քաղաքականության մեջ, դա նշանակում է, որ Եկեղեցու ղեկավարության հետ մի բան այն չէ՝ առնվազն այդ առումով։ Եթե նման հարց կա ձևակերպված մեր հանրության մեջ, դա վկայում է պրոբլեմի մասին, որն ունի աստվածաբանական և քաղաքական-տրամաբանական բաղադրիչներ։ Աստվածաբանական բաղադրիչը վեճի ենթակա չէ․ կուսակրոն լինելու վերաբերյալ եկեղեցական կանոնը հստակ է՝ կաթողիկոսը պետք է լինի կուսակրոն։ Հիմա մենք չիմանա՞նք՝ ինչի հետ գործ ունենք»,- այս մասին «Ֆակտոր»-ի եթերում նշեց ԱԺ փոխնախագահ Ռուբեն Ռուբինյանը՝ անդրադառնալով իշխանություն-Եկեղեցի՝ վերջին շրջանի լարվածությանը։
Նրա դիտարկմամբ՝ 2020 թվականից հետո Եկեղեցու ղեկավարությունը բացահայտ ընդդիմադիր դիրք է բռնել, ինչը խնդիր չէ։ «Ցանկացած ՀՀ քաղաքացի կարող է զբաղվել քաղաքականությամբ, բայց չպետք է Սուրբ Եկեղեցին դարձնի վահան և քաղաքական կապիտալ իր համար․․․»,- նշեց Ռուբինյանը՝ հավելելով՝ իշխանության կողմից ցանկացած հակադարձում անվանում են հարձակում Եկեղեցու, ազգային արժեքների դեմ․ եթե խոսում ենք ազգային արժեքներից, իրավունք ունե՞նք իմանալու՝ Եկեղեցու ֆունդամենտալ կանոններից մեկը պահպանվում է, թե ոչ։

«Վերջերս ՀԱԵ արքեպիսկոպոսներից մեկը՝ Գերաշնորհ Տեր Բագրատ արքեպիսկոպոս Գալստանյանը հայտարարեց, որ իր հետ կապ են հաստատել տարբեր աշխարհաքաղաքական ուժային կենտրոններից և ասել են՝ եթե Նիկոլ Փաշինյանին չհեռացնեք իշխանությունից, Հայաստանը վերածվելու է թմրանյութերի բիզնեսի որջի, ընտանիքի նոր մոդելներ են ստեղծվելու, Հայաստանը հանձնվելու է․․․,- նշեց Ռուբինյանը,- ստացվում է, որ օտարերկրյա ուժային կառույցը կամ հատուկ ծառայությունը կապ է հաստատել Հայ Առաքելական Եկեղեցու սպասավորի հետ, որը համատեղությամբ զբաղվում է քաղաքականությամբ, և իրեն կոչ է արել հեռացնել ՀՀ լեգիտիմ ընտրված իշխանությանը․․․»։

Ռուբինյանն ասաց, որ Վեհափառը պետք է գնահատական տա․ «Նորմա՞լ է, որ գործող արքեպիսկոպոսը շփվում է օտարերկրյա հատուկ ծառայությունների հետ, և իրեն իշխանափոխության կոչ են անում։ Այս մարդն օտարերկրյա կառույցի հետ շփել է արտերկրից եկող նարատիվներով ՀՀ-ում իշխանափոխության համար»։