«Եկեղեցին ինստիտուտ է՝ բոլոր ինստիտուտների բնորոշ թերացումներով»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Այսպիսի մի հայտարարություն է հնչում հաճախ՝ «եկեղեցին պետք է ինքնամաքրվի»:
Հարգելիներ, եկեղեցին գետ չէ, որ ինքնամաքրվի: Ինքնամաքրման բնական ֆունկցիա ունեն գետերը, այն էլ իհարկե ռիսկերի որոշակի ծավալի դեմ պայքարում:
Եկեղեցին ինստիտուտ է, բոլոր ինստիտուտների բնորոշ թերացումներով, բացերով, արատներով և այլն:
Ինստիտուտները չեն ինքնամաքրվում, թերևս պետք չէ ոչինչ չասող գեղեցիկ ձևակերպումներով «լվանալ ուղեղներ»:
Աճում, արդիականանում, առաջընթաց են ապրում հասարակությունները, դրանով ստիպելով առաջընթաց ապրել նաև ինստիտուտներին՝ պետականից մինչև դավանական:
Իսկ հանրությունների առաջընթացը ապահովում են վերնախավերը:
Այո, այդ տեսանկյունից, ցավոք սրտի Հայաստանում մեղմ ասած թերացել ու թերանում են թե քաղաքական, թե տնտեսական, թե այսպես կոչված քաղաքացիական կամ հանրային, և թե անշուշտ հոգևոր վերնախավերը:
Նրանք թերացել են Հայաստանի հանրության արդիականացման գործուն օրակարգ ձևավորելու հարցում:
Նաև հենց այդ համատեքստում է, որ այս օրերին պարբերաբար արտահայտում եմ այն միտքը, որ մենք եկեղեցու շուրջ ստեղծված իրավիճակում անընդհատ «Փաշինյան-Փաշազադե» «բացատրությունը» բերելով, գուցե արտահայտում ենք բավականին լավ «սպառվող» խոսույթ, բայց բացարձակապես չենք մոտենում խնդիրների առարկայական խորքին»։