«Փաստացի Նիկոլ Փաշինյանն անում է ճիշտ այն, ինչը պետք է Հայաստանը քանդելու համար»․ Մարինե Պետրոսյան

Ակնհայտ է, որ մեր դեմ քարոզչական մեքենա է աշխատում։ Նիկոլ Փաշինյանի և իր թիմի գործողություններում թուրքական և հատկապես ադրբեջանական պատումներն են, նրանց նպատակների իրագործումը։ Դրան դժվար է հավատալ, քանի որ կարծես սարսափ հեքիաթ լինի։ «168»-ի եթերում այս կարծիքը հայտնեց բանաստեղծ Մարինե Պետրոսյանը՝ պարզաբանելով, թե ինչպես է դա հնարավոր։ «Փաստացի, Նիկոլ Փաշինյանն անում է ճիշտ այն, ինչը պետք է Հայաստանը քանդելու համար։ Անշուշտ, նա խնդիրներ ունի, և դա պարզ տեսանելի է, բայց այս ամենը միայն անձնական հանգամանքով չի բացատրվում։ Մենք պետք է գիտակցենք, որ մեր դեմ հսկա մեքենա է աշխատում․․․
Ի՞նչ պիտի անի որևէ երկրի ղեկավար, եթե իր երկրի դեմ նման սպառնալիքներ կան։ Եթե հանգիստ ժամանակ երկրի ներսում հակասություններ կան, և դա բնական է, սպառնալիքի դեպքում պետք է համախմբվել։ Եթե երկրիդ կենաց-մահու վտանգ է սպառնում, դու բոլոր միջոցներով պետք է համախմբես, դա քո շահն է։ Ի՞նչ է անում Փաշինյանը՝ ճիշտ հակառակը։ Ուրեմն՝ նա մեր երկրի ղեկավարը չէ, որքան էլ դա դժվար է պատկերացնել»,- ընդգծեց Պետրոսյանը: