«Ի՞նչ է թաքցնում Կենտրոնական բանկը հունիսի 10-ի հայտարարության հետևում». Մհեր Կարագոզյան
238
Ուրբաթ, 13 հունիսի, 2025 թ., 04:18
«Հանրային վերահսկողություն» ՀԿ նախագահ Մհեր Կարագոզյանի ֆեյսբուքյան գրառումը․ ««Սառեցո՞ւմ», թե՞ մոլորեցում. ի՞նչ է թաքցնում Կենտրոնական բանկը հունիսի 10-ի հայտարարության հետևում Հունիսի 10-ին Կենտրոնական բանկի նախագահ Մարտին Գալստյանը հայտարարել է, որ խարդախության զոհ դարձած քաղաքացիների վարկերը կսառեցվեն՝ մինչև դատարանի որոշման հրապարակումը։ Բայց, ի տարբերություն հանրության սպասումների, նա ոչ մի բառ չի ասել այն հազարավոր քաղաքացիների մասին, որոնց հաշիվներից գողացվել են գումարներ՝ հաճախ հենց բանկերի թվային անպաշտպանության և անփույթ նույնականացման հետևանքով։ Այս մարդիկ շարունակում են մնալ առանց պաշտպանվածության, առանց փոխհատուցման, միայնակ՝ իրենց ցավով ու վարկով։ ԿԲ-ի այս «սառեցման» խոստումը դեռևս չունի իրավական ուժ և չգիտենք բանկերը այս դեպքում ինչպիսի հնարքներ կբանեցնեն։ Հիշեցնենք՝ ԿԲ նախագահի նախորդ հայտարարությունը, թե իբր վարկերը «արդեն սառեցվել են», գործնականում վերածվեց բանկերի նոր հնարքի․ քաղաքացիներին առաջարկվեցին նոր երկարաժամկետ պայմանագրեր՝ վարկերը հետաձգելով 3 կամ 5 տարով, տոկոսադրույքը իջեցնելով մինչև 12%, բայց իրականում դրանք դարձան նոր իրավական ծուղակներ՝ առանց որևէ իրական սառեցման։ Քաղաքացիները փաստացի պարտավորվեցին նոր պայմանների՝ երկարատև կախվածության և վերահսկման ներքո։ Իսկ հիմա ԿԲ-ն կրկին հնչեցնում է նմանատիպ հայտարարություն՝ առանց հստակ մեխանիզմի, երբ բանկերը դեռևս վերադաս մարմիններից որևէ իրավական պարտադիր հրահանգ չեն ստացել։ Ստացվում է՝ ԿԲ-ն պարզապես «խոստանում է»՝ առանց գործիքակազմ ապահովելու, և մեր քաղաքացիները նորից դառնում են բանկերի շահարկման զոհ։ Պահանջում ենք․ Վարկերի սառեցման հստակ, պարտադիր իրավական կարգավորում՝ ԿԲ-ի կողմից, ոչ թե մանիպուլյատիվ խոստումներ։ Բանկային խարդախությունների զոհերի՝ գողացված գումարների հարցի կարգավորում և փոխհատուցման օրինական մեխանիզմներ։ Բանկերի կողմից քաղաքացիներին նոր պայմանագրերի պարտադրման կանխարգելում՝ «սառեցման» պատրվակով։ Այս ամենը ոչ թե բարի կամքի, այլ հստակ կանոնակարգման և վերահսկողության հարց է։ Եթե բանկերը չեն ստանում պաշտոնական հրահանգ, նրանք գործում են միայն իրենց շահերից ելնելով։ Եթե դուք կամ ձեր շրջապատից որևէ մեկը դարձել է բանկային խարդախության կամ նման «սառեցման» մանիպուլյացիայի զոհ՝ գրեք մեզ։ «Հանրային վերահսկողություն» ՀԿ-ն հավաքագրում է դեպքերը՝ հանրային ու իրավական պայքարը կազմակերպելու համար»։
