«Այս համայնքների խոշորացումը դիտարկում ենք բացառապես քաղաքական ենթատեքստում»․ Սևակ Խաչատրյան

«Արգիշտի Մեխակյանը եղել է Խոյ համայնքի համայնքապետը։ Այս համայնքների խոշորացումը մենք դիտարկում ենք բացառապես քաղաքական ենթատեքստում։ Եթե այս խոշորացումը համայնքների շահերից ելնելով է արվում, ապա ինչո՞ւ 2021թ․ ՏԻՄ ընտրությունների ժամանակ չարվեց կամ ինչո՞ւ է միայն Խոյ համայնքը միացվում Վաղարշապատին»,- այս մասին լրագրողների հետ զրույցում նշեց «Էջմիածին» կուսակցությունների դաշինքի ավագանու անդամ Սևակ Խաչատրյանը։

Նա նաև հավելեց, որ առաջիկայում ավագանու անդամների 1/3-ի պահանջով ևս մեկ նիստ կհրավիրեն առաջիկա 10 օրվա ընթացքում․ «Եթե դա էլ չկայանա, ինչպես այսօր արդեն հայտարարել են ՔՊ-ականները՝ տարբեր լրատվամիջոցներով, Արմավիրի մարզպետ Արգիշտի Մեխակյանն է նշանակվելու Վաղարշապատ համայնքի ղեկավարի պաշտոնակատար»։

Հիշեցնենք՝ Վաղարշապատ համայնքի ավագանու ընտրության հարցով արտահերթ նիստը չկայացավ, «Քաղաքացիական պայմանագիր» խմբակցությունը չներկայացավ։
Իշխող ուժից ավելի վաղ ասել էին, որ տապալելու են համայնքի ղեկավարի ընտրությունը, որպեսզի վարչապետն առաջիկայում հնարավորություն ունենա նշանակել ժամանակավոր պաշտոնակատար, և արդեն թեկնածու էլ ունեն՝ Արմավիրի գործող մարզպետ Արգիշտի Մեխակյանը: