«Բարդագույն ճանապարհ է՝ ձեռք սեղմել և նստել քեզ ոչնչացնել ցանկացողի հետ». Արման Բաբաջանյան

ԱԺ նախկինպատգամավոր Արման Բաբաջանյանի ֆեյսբուքյան գրառումը. «Թուրքիայի հետ հարաբերություններին բարդ փորձություն է սպասում։ Դրանք կշարունակեն մնալ լի անհամաձայնություններով, ցավով և հիշողությամբ։ Բայց Հայաստանի համար Թուրքիայի հետ չխոսել նշանակում է Ռուսաստանին այս տարածաշրջանում հավերժ մնալու լավագույն պատրվակ և Թուրքիայի համար՝ Ռուսաստանի ներկայությունը որպես սեփական թիկունքը վերահսկելի պահելու ամենաէժան միջոց պահպանել։
Ստեղծված իրավիճակում Հայաստանի համար միակ պատասխանատու ռազմավարությունը Թուրքիայի հետ հարաբերությունների կառուցումն է՝ առանց ինքնախաբեության, առանց անցյալի մոռացության, բայց պետության շահի հաշվարկմամբ։
Թուրքը չի դառնալու «փրկիչ», բայց նա չի լինելու այն «կեղծ թշնամին», որի անվան տակ Ռուսաստանը կշարունակի մեզ վասալի պես պահել գազի խողովակի, ռազմաբազայի ու «խաղաղապահի» զենքի տակ։
Մեր պետության ռազմավարական խնդիրը մեկ բան է՝ կոտրել այս հավերժ շրջափակումը, բացել այլընտրանքային ուղիներ և աշխարհին ներկայանալ որպես սուբյեկտ, որպես լիիրավ կողմ, ոչ որպես գործիք։
Սա բարդագույն ու գրեթե անհնար ճանապարհ է՝ նստել և ձեռք սեղմել քեզ ոչնչացնել ցանկացողի հետ։ Բայց առանց այդ քայլի կմնանք նույն՝ ռուս-թուրքական վանդակում, նրանց համատեղ խաղի անատամ, անկարող, անպետք գործիք։ Եթե այս շղթան չբացենք, կկորցնենք ևս մեկ դար։ Եթե կարողանանք, կկոտրենք փականները՝ առաջին անգամ լինելով այս տարածաշրջանի որոշում կայացնողների հետ նույն սեղանին։
Ոչինչ չանելն է ամենամեծ սպառնալիքը՝ թողնել, որ մյուսները շարունակեն տնօրինել մեր ճակատագիրը»: