«Մենք Հայաստան-Թուրքիա հարաբերությունների լայն օրակարգ ունենք»․ Վլադիմիր Վարդանյան

«Մենք մշտապես փորձում ենք կառուցել հայ-թուրքական հարաբերությունները հայ-ադրբեջանական հարաբերությունների կոնտեքստում։ Բայց պետք է հաշվի առնենք, որ ՀՀ-Թուրքիա երկկողմ հարաբերությունները ունեն կարևոր նշանակություն։ Չենք կարող փոխել մեր աշխարհագրությունը, մեր հարևանների հետ պետք է ունենանք բարիադրացիական հարաբերություններ, որոնք հնարավորություն կտան ձևավորել այնպիսի միջավայր, որը կբերի երկարատև և կայուն խաղաղություն տարածաշրջանում»,- խորհրդարանական ճեպազրույցի ժամանակ ասաց ՔՊ խմբակցության պատգամավոր Վլադիմիր Վարդանյանը։

«Մենք ավելի լայն օրակարգ ունենք, մշտապես խոսում և շարունակելու ենք խոսել Հայաստան-Թուրքիա նորմալ դիվանագիտական հարաբերությունների հաստատման և դրանից հետո առավել ակտիվ հնարավորություններ ընձեռել մեր քաղաքացիներին, տնտեսվարողներին՝ առևտրային, տնտեսական և այլ հարաբերությունների մեջ մտնելու Թուրքիայի հետ»,- նշեց Վարդանյանը և ընդգծեց, որ ՀՀ-ի և հարևանների միջև պետք է լինի այնպիսի փոխադարձ վստահության մթնոլորտ, որը պետք է թույլ տա ստորագրել խաղաղության փաստաթուղթը։