«Խղճուկ երթը արմատախիլ արեց ժողովրդին մոլորեցնելու, եկեղեցին որպես վահան օգտագործելու փորձերը»․ Արման Բաբաջանյան

ԱԺ նախկինպատգամավոր Արման Բաբաջանյանի ֆեյսբուքյան գրառումը. «Այսօրվա խղճուկ երթը դեպի Մայր Աթոռ Սուրբ Էջմիածին վերջնականապես ցույց տվեց ամենակարևորը՝ ժողովուրդը ձեզ չի հետևում, որովհետև վաղուց հասկացել է՝ եկեղեցուն ոչ մի իրական վտանգ չի սպառնում, իսկ նրա միակ իրական սպառնալիքը հենց դուք եք։
Ձեր կողքին կանգնած բանդիտները, Ռուսաստանում թաքնված մարդասպանների կոչերն ու հորդորները ձեր «սրբազան» դիմակը ամբողջությամբ պատռեցին։ Ժողովուրդը տեսավ ձեր իսկական դեմքը և իր լռությամբ ասեց ամենաուժեղ խոսքը։
Որպեսզի ավելի պարզ լինի՝ եթե եկեղեցին պետք է պաշտպանել, ապա միայն ձեզնից։
Եկեղեցին չի պատկանում ոչ մեկին՝ ոչ գրպանի հաստությունը, ոչ բարձրախոս ամբիոնը, ոչ էլ ճակատին ցուցադրաբար դաջված խաչը չեն որոշում նրա ուժը:
Եկեղեցին պատկանում է ժողովրդին՝ անբասիր, զուսպ հավատացյալին, հացի վրա խաչ դրոշմող համեստ հոգևորականին, զավակին մկրտող աբեղային, լուռ աղոթող դպիրին ու սարկավագին։
Այսօրվա երթը արմատախիլ արեց ձեր բոլոր փորձերը՝ ժողովրդին մոլորեցնելու, հավատքն ու եկեղեցին որպես վահան օգտագործելու»։