«Փաշինյանի այցը սկզբունքային նոր բան չի բերի, Թուրքիան իր դիրքորոշումը կպահպանի»․ Ռուբեն Սաֆրաստյան

«Ես չեմ կարծում, որ կապ ուներ Ստամբուլում Թուրքիայի նախագահի և Հայաստանի վարչապետի հանդիպումը Իսրայել- Իրան պատերազմի հետ, հավանական է, որ ավելի վաղ էր որոշումն ընդունվել»,- այս մասին լրագրողների հետ զրույցում նշեց թուրքագետ Ռուբեն Սաֆրաստյանը։

«Հայ-թուրքական հարաբերությունների կարգավորման գործընթացում Փաշինյանի այցը սկզբունքային ինչ-որ նոր բան չի բերի, և Թուրքիան իր դիրքորոշումը կպահպանի։ Իսկ Թուրքիայի դիրքորոշումն այն է, որ մինչև Հայաստանն Ադրբեջանի հետ պայմանագիր կամ համաձայնագիր չստորագի, Թուրքիան քայլեր չի ձեռնարկի Հայաստանի հետ հարաբերությունների կարգավորման առումով։ Այդ առումով Փաշինյանի այցը ոչ մի արդյունք չի տա»,- ընդգծեց թուրքագետը։

Անդրադառնալով ԻՀԿ նստաշրջանում ընդունված բանաձևին, որը բացահայտ հակահայկական բնույթ ուներ, Սաֆրաստյանը նշեց․ «Իհարկե դա շատ վտանգավոր է, որ Ադրբեջանը Թուրքիայի աջակցությամբ կարողանում է իր այդ մոտեցումները տարածել մի շարք երկրների վրա»։