«Կանխվել է մի բան, որը նախկինում չենք կարողացել կանխել»․ Անդրանիկ Քոչարյան

«Ինչո՞ւ հիմա, որովհետև վաղը կարող էր ուշ լինել»,- այս մասին Հանրային ՀԸ եթերում ասաց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով դիտարկմանը, թե պատերազմից հետո Միքայել արքեպիսկոպոս Աջապահյանը հեղաշրջման կոչեր է արել, և միայն նա չէ այդպիսի կոչեր արել, ինչո՞ւ են հիմա քրեական հետապնդումներ սկսվել։

«Ըստ էության՝ քաոսի հասնելու նպատակ կար․․․ Հրապարակված փաստաթուղթը («հեղաշրջման պլան»-խմբ․) հիմա է երևի հայտնվել, բայց գրառումներն արված են 2024 թվականին, այսինքն՝ մարդիկ դեռ 2024 թվականից են քայլեր մտածել, թե ինչ կարելի անել, որ հասնեն նպատակին, որը ընտրությունները չեն․ պարզ երևաց, որ այս գործընթացը իր բնույթով ահաբեկչական գործողությունների պլանավորման գործընթաց է՝ կոնկրետ մարդկանց միջոցով, մտածում էին իշխանության խնդիրը ոնց լուծեն․․․ Կանխվել է մի բան, որը նախկինում մենք չենք կարողացել կանխել դեռ 1999 թվականի հոկտեմբերի 26-ին, դրա համար հոկտեմբերի 27 տեղի ունեցավ․․․ Զենքի մի փոքր մասն է հայտնաբերված, բայց մենք գիտենք՝ ինչքան զենք կա թաքցված պատերազմից հետո, և դրա հայտնաբերման ուղղությամբ մենք բավականին աշխատանք ունենք կատարելու»,- նշեց Քոչարյանը։