«Անգամ «անձնական կյանք» բառակապակցության իմաստը չի հասկանում». Արմինե Օհանյան

«Հրապարակ» օրաթերթի խմբագիր Արմինե Օհանյանի ֆեյսբուքյան գրառումը․ «Ալամ աշխարհին կրթելու առաքելություն ստանձնած ամուսինները, պարզվում է, տարրական բառերի եւ հասկացությունների իմաստը չեն հասկանում։ Դա մեծ աղետ չէր լինի այս համատարած աղետների կողքին, եթե բառերի իմաստը չհասկանալով՝ տեքստեր չգրեին, բոցաշունչ ճառեր չասեին, քայլեր չձեռնարկեին ու մանիպուլյացիաներ չանեին։ Ասում է՝ կաթողիկոսը չի կարող ունենալ անձնական կյանք, ապա շարունակում է՝ եթե մարդն ունի անձնական կյանք, ինքը ուրեմն կաթողիկոս չի․․․
Պարզ է, որ մարդն «անձնական կյանք» բառակապակցության իմաստը չի հասկանում։ Անձնական կյանք ասելով հասկանում է բացառապես տղամարդ-կին, կամ՝ սեռական հարաբերությունները։ Բայց բոլոր գրագետ մարդիկ գիտեն (պետք է իմանան), որ անձնական կյանք է նաեւ մարդու առողջական վիճակի, հիվանդությունների, քաղաքական հայացքների, կրոնական կամ փիլիսոփայական համոզմունքների, բանկային հաշվի, գենետիկայի ու ծագումնաբանության մասին տեղեկությունները։ Անձնական կյանք է նաեւ մարդու ընկերների, եղբայրների, քույրերի՝ ընտանիքի մասին ցանկացած տեղեկություն։ Անձնական կյանքի մեջ են մտնում մարդու եւ իր փաստաբանի հարաբերությունները, անձնական լուսանկարները՝ արված ոչ պաշտոնական միջավայրում, մասնավոր զրույցները տարբեր անձանց հետ։ Եթե մարդը կաթողիկոս է կամ բարձրաստիճան հոգեւորական, չի նշանակում զրկված է անձնական կյանք ունենալու եւ անձնական կյանքի գաղտնիության իրավունքից, որը երաշխավորված է Սահմանադրությամբ»: