«Բա որ էդ մի մարդն է որոշում՝ ով նստի, Ռոբերտ Քոչարյանն Էգեյան ծովում ի՞նչ գործ ունի»․ Թագուհի Ղազարյան

«Լևոն Քոչարյանն ասում է, որ մի մարդ է որոշում՝ ով նստի, ով՝ ոչ։ Բա որ էդ մի մարդն է որոշում, ձեր հայրն Էգեյան ծովում ի՞նչ գործ ունի»,- ԱԺ-ում իր ելույթի ժամանակ ասաց ՔՊ-ական պատգամավոր Թագուհի Ղազարյանը՝ նկատի ունենալով երկրորդ նախագահ Ռոբերտ Քոչարյանին։ Նրա խոսքով՝ «Պատիվ ունեմ»-ի կողմից «հիմար խոսույթ» է գեներացվում, թե իբր Նիկոլ Փաշինյանը որոշել է, որ Ռոբերտ Քոչարյանը չնստի, քանի որ «լավ» ընդդիմադիր է․ «Իսկ Սերժ Սարգսյանն ազատության մեջ ի՞նչ գործ ունի։ Երբ մեզ տեսնում են փողոցում, առաջին հարցն այն է, թե Քոչարյանն ու Սարգսյանը ինչի՞ նստած չեն։ Մատի փաթաթան են սարքել վարչապետի այն խոսքը, թե չկա մի դատավոր, որ իր ասածը չի անի։ Այդ օրը հարթակից վարչապետը պատմում էր, թե ոնց են իրեն գրում, զանգում, ասում, թե ինչի՞ Քոչարյանը նստած չէ, ինչի՞ Սաշիկի տղային բաց թողեցիք, վարչապետն ասել է. «Ինչի կա՞ նենց դատավոր, որ իմ ասածը չի անի, բայց ես ինձ թույլ չեմ տալիս, որովհետև չեմ ուզում ցածրացնել հեղափոխության բովանդակությունը»։ Ու այս 7 տարվա մեջ կտրել են այդ նախադասության սկիզբն ու թափահարում են»,- ասաց Ղազարյանը։