«Այս «ինքնիշխան» բանակցողները Հայաստանը տանում են շատ վտանգավոր ուղիներով»․ Տաթևիկ Հայրապետյան

Ադրբեջանագետ Տաթևիկ Հայրապետյանի ֆեյսբուքյան գրառումը․ «Եկեք ընդունենք, որ Փաշինյանն ու նրա թիմը «ֆենոմենալ» բանակցողներ են։ Նրանք զիջել են հնարավոր ամեն ինչ, հրաժարվել մեր ամրագրված իրավունքներից գործընթացի ժամանակ՝ առանց դիմացը որևէ բան ստանալու, հրաժարվել են կարևորագույն լծակներից, բացառիկ խաղաքարտեր դրել Բաքվի ձեռքին՝ դիմացը չստանալով ոչինչ, բացարձակապես ոչինչ։ Մենք հասել ենք մի հանգրվանի, որ օկուպացված Ստեփանակերտից Ալիևը ՀՀ տարածքը կոչում է «Արևմտյան Ադրբեջան»՝ զավթողական կոնցեպտին համահունչ։ Այդ ամենը կոչվում է «խաղաղության» օրակարգ։
Այսքանից հետո ձևավորվել է հայկական կողմի միակողմանի զիջումների հիման վրա ձևավորված «խաղաղության պայմանագիր» կոչված թուղթ, որը Ալիևը համառորեն հրաժարվում է ստորագրել։ Շատերը չեն էլ հասկանում, թե ինչու։ Բայց պատասխանն այնքան պարզ է, քանի որ Ալիևը գործընթացից մաքսիմալ արդյունք է ստանում, որքան երկար տևի գործընթացը, այնքան արագ «կդեղնեն» ու ինչու չէ «կանաչ» կդառնան Փաշինյանի հռչակած «կարմիր գծերը»։
Բացի այդ, խաղաքարտերը Ալիևի ձեռքին է, Փաշինյանը զրկված է լծակներից, ուստի ամբողջությամբ Ալիևի ճշման տակ է ու նրա կամքին է ենթակա, այսօր էլ փաստացի Ալիևի երազանքների թարմացված ցանկին է ծանոթացել։
Այս «ինքնիշխան» բանակցողները Հայաստանը տանում են շատ վտանգավոր ուղիներով, մինչդեռ խելացի, կազմակերպված ու բովանդակային դիվանագիտությունը այնքան բան կարող է փոխել, ուզում ես հաջողել՝ երբեք մի զիջի խաղաքարտերդ՝ առանց դիմացը որևէ բան ստանալու, բանակցության տարրական օրենքներից է դա»։