«Դա ոչ թե հոգևոր նախաձեռնություն է, այլ քաղաքական ակտ». Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Արա Աբրահամյանի հայտարարած «եկեղեցու պաշտպանության համաժողովը» հոգևոր նախաձեռնություն չէ։ Դա քաղաքական ակտ է՝ ուղղված մի նպատակին՝ կոծկելու այն փաստը, որ Ռուսաստանը և նրա ազդեցության ցանցը, որի կարկառուն ներկայացուցիչներից է հենց ինքը՝ Աբրահամյանը, տարիներ շարունակ հետևողականորեն քայքայել են թե՛ Հայաստանի պետականությունն ու ինքնիշխանությունը, և թե՛ Հայ առաքելական եկեղեցին՝ զրկելով նրան անկախ ձայնից, արժանապատիվ կեցվածքով հանդես գալու հնարավորությունից։
Ո՞ւր էր Աբրահամյանի «հավատքը», երբ Ռուսաստանը պաշտոնապես հայտարարում էր Թուրքիայի հետ Ղարաբաղում «հաջող ռազմական օպերացիայի» մասին։ Երբ Պուտինը դեռ 2020-ին Արցախը հայտարարեց Ադրբեջանի մաս։ Երբ ՀԱՊԿ-ը, Մոսկվան լռում էին Հայաստանի սահմանների պարբերական խախտումների հարցում։ Երբ Ադրբեջանը հարձակվում էր Հայաստանի տարածքի վրա, իսկ Ռուսաստանը ոչ միայն լուռ դիտորդ էր, այլև հետագայում արդարացնում էր այդ ագրեսիան։ Երբ Արցախը հայաթափվեց՝ ռուս խաղաղապահների աչքի առաջ։ Երբ Ռուս Ուղղափառ եկեղեցին համագործակցում է Ադրբեջանի հետ՝ հայկական հոգևոր և մշակութային ժառանգությունը յուրացնելու համար։
Տարիներ շարունակ ապրելով հայկական ազգանունով՝ դուք գործել եք ռուսական օրակարգով։ Ձեր կապերն ու դիրքը ծառայեցրել եք ոչ թե Հայաստանին օգնելու, այլ Հայաստանի վրայով ռուսական վերահսկողությունը խորացնելու համար։ Մինչ հայ ժողովուրդը պատերազմում էր, զավակ էր կորցնում, վիրավորներին դուրս էր բերում մարտի դաշտից, դուք զբաղված էիք Կրեմլին կից «հայկական կառույցներ» ձևավորելով։
Դուք Երևանում ոչ մի հայկական եկեղեցի չեք կառուցել։ Չեք հովանավորել ոչ մի համալսարան, գիտական կենտրոն, հիվանդանոց, բարեգործական ճաշարան։ Չեք կանգնել ոչ մի աղքատ ընտանիքի, անօթևան երեխայի, վիրավոր զինվորի կողքին։ Բայց Երևանի սրտում կառուցել եք շքեղ ռուսական եկեղեցի՝ իբրև «հայ–ռուս եղբայրության» խորհրդանիշ՝ վերածելով այն հոգևոր ենթակայության և քաղաքական գերակայության խորհրդանիշի։
Եթե դուք եք Հայ առաքելական եկեղեցու պաշտպանը, ուրեմն մեր եկեղեցին լիովին անպաշտպան է։
Ձեր պաշտպանությունը լռությունն է՝ երբ խոսել է անհրաժեշտ։ Ձեր հավատքը՝ հնազանդությունն է, ոչ թե արդարությունը։ Ձեր եկեղեցին Էջմիածնում չէ, այլ Կրեմլի տանիքի տակ։ Եթե ձեր նմաններն են այսօր խոսում եկեղեցու անունից, նշանակում է՝ եկեղեցին շրջափակման մեջ է։
Դուք եկեղեցում ներդրած Տրոյական ձի եք՝ ներսից այն քանդելու համար։ Ոչ թե հավատք պաշտպանող եք, այլ հավատքը վարկաբեկող։ Ոչ թե Աստծու, այլ Կրեմլի սպասավորներ եք։ Դուք չեք կարող մեր եկեղեցին պաշտպանել։ Հայ եկեղեցին պետք է պաշտպանել ձեզնից»: