«Հիմնավոր կասկած ունեմ, որ այդ 6800 աշխատակիցը պետք է իրենց»․ Դավիթ Ղազինյան

«Օրենսդրական նախաձեռնությունը բացարձակ անգրագիտություն էր․․․ Շեշտը ցանկանում եմ դնել քաղաքական գործոնի վրա։ Այն, որ իբրև թե վարչապետը դիմել էր ՏԿԵ նախարարին՝ ինչ-որ մեյլով՝ մեկ ամիս ժամանակի և ինչ-որ վնասների մասին, ևս մեկ անգամ ցանկանում եմ ընդգծել, որ այդ մեկ ամսվա ընթացքում այդ նամակի բովանդակությունը ՀԷՑ-ի ղեկավարության համար չի բացվել և այդ նամակի բովանդակության վերաբերյալ քննարկումներ չեն եղել»,- այս մասին լրագրողների հետ զրույցում հայտնել է ՀԷՑ-ի գլխավոր տնօրեն Դավիթ Ղազինյանը։

«Որքան գիտեմ, նամակում ասվում էր, որ եթե այս-այն հարցը չլուծվի այս ժամանակահատվածում, գնալու ենք պետականացման։ Մեզ հետ դա չի քննարկվել»,- հավելել է Ղազինյանը։

Նրա դիտարկմամբ՝ ընթացող պրոցեսը քաղաքական է, և այդ մասին ապացուցում է նաև ՀԷՑ կառավարչի պաշտոնակատարի նշանակումը։ «Կառավարիչ է նշանակվել իշխող քաղաքական թիմի ամենակարկառուն ներկայացուցիչներից մեկը՝ չունենալով որևէ մասնագիտական փորձ։

Հաշվի առնելով նաև եկող տարվա սպասվող իրադարձությունները (նկատի ունի ընտրությունները-խմբ.)՝ դա ևս մեկ ապացույց է, որ այս պրոցեսը քաղաքական է․ 6800 աշխատակից ունենք, հիմնավոր կասկածներ ունեմ, որ երևի թե պետք էր այդ 6800 աշխատակիցը իրենց»։