«Արտապատվիրակել եզրույթն ի ցույց է դնում հայկական դիվանագիտության անհաջողությունը»․ Ռուբեն Մելքոնյան

«ՀՀ-ի առջև այսօր ծառացած ամենակարևոր արտաքին սպառնալիքը ստացել է «Զանգեզուրի միջանցք» անվանումը․․․ Արտապատվիրակել եզրույթն ինքնին ի ցույց է դնում այն, որ հայկական դիվանագիտությունը չի կարողացել դիմագրավել թուրք-ադրբեջանական պահանջներին ու սպառնալիքներին և փաստացի ընդունել է այդ պահանջները, և դա փորձում են ներկայացնել բառախաղի միջոցով»,- այս մասին լրագրողների հետ զրույցում նշեց թուրքագետ, ԵՊՀ արևելագիտության ֆակուլտետի դեկան Ռուբեն Մելքոնյանը։

«Թուրք-ադրբեջանական կողմն ուզում է ոչ թե ուղղակի ճանապարհ, այլ ուզում է կոնկրետ Արաքսի երկայնքով՝ հայ-իրանական սահմանի երկայնքով տարածք, որը չունի ո՛չ լոգիստիկ, ո՛չ տնտեսական նշանակություն, այլ ունի բացառապես քաղաքական ու գաղափարախոսական նշանակություն։ Դա ունի նաև տարածաշրջանային մեծ նշանակություն, որովհետև վերաբերում է ոչ միայն Հայաստանին, այլ նաև մի քանի այլ պետությունների։ Դա որպես զուտ լոգիստիկ խնդիր ներկայացնելն ուղղակի իրենց պարտության, դիվանագիտական անհաջողության քողարկման փորձեր են»,- նշեց Մելքոնյանը։

Նրա դիտարկմամբ՝ այդ ամենին դիմագրավելու խնդրի հետ կապված, կան օբյեկտիվ և սուբյեկտիվ պատճառներ․ «Օբյեկտիվ պատճառն այն է, որ ՀՀ-ն գերթուլացած է դիմագրավելու համար, սուբյեկտիվ պատճառն այն է, որ գործող իշխանությունները ո՛չ այդ հմտությունն ունեն, ո՛չ այդ վտանգի գիտակցումը»։