«Լինենք բարձր ու միաբան, չարիքը հաղթահարելու այլ ձև չեմ տեսնում». Տաթևիկ Հայրապետյան

Ադրբեջանագետ Տաթևիկ Հայրապետյանի ֆեյսբուքյան գրառումը․ «Հայ առաքելական եկեղեցու հետ կապված վերջին գրառումներից հետո արդեն քանի օր է, ինչ երկրի գլխավոր «ստատուսագիր-ուրոլոգը» հայ հանրությանը պահում է մեծագույն հոգեբանական սթրեսի մեջ։ Քանի որ շատերս համոզվել ենք, որ նա չունի արգելակներ, կատարյալ բարոյազուրկ է, ունակ ամեն ինչի, ուստի շատերը տագնապած սպասում են, թե ինչ քայլեր է նա մտածել Ամենայն հայոց կաթողիկոսի և Վեհարանի դեմ։
Ես չգիտեմ՝ ինչ է նա մտածել, բայց կարծում եմ՝ նա նման հոգեբանական գրոհով նաև ցանկանում է տրամադրություններ ստուգել, արձագանքներ հասկանալ որևէ քայլ անելուց առաջ, դրա համար հանրային հստակ դիմադրությունը կարող է զսպաշապիկ հանդիսանալ (հիշեք նա ապրում ու կառավարում է «Ֆեյսբուք»-ում՝ կարդալով բոլոր գրառումներն ու մեկնաբանությունները, այդքան պարապ է նա)։
Նա միգուցե նաև հաշվարկել է, որ սթրեսային իրավիճակում թե՛ Վեհափառը, թե՛ եկեղեցու սպասավորները, հոգևոր հայրերը կարող են անել արտահայտություններ կամ քայլեր, որոնք Փաշինյանը կուղղի եկեղեցու դեմ։ Դրա համար կարևոր է լինել միաբան ու համբերատար, որքան էլ դա բարդ է։
Այն, որ Հայ առաքելական եկեղեցու դեմ արշավը կարգադրված է Բաքվից, դա առաջինը հանրային տիրույթում հենց ինքս եմ փաստերով ցույց տվել, դրան էլ չեմ ուզում անդրադառնալ։
Բայց կասեմ հետևյալը՝ ցանկացած պայքար, դա նաև նյարդերի ու համառության պայքար է։ Եթե դիմացինդ կատարյալ է իր բարոյազրկության ու արատավոր գործողությունների գնալու գործելաոճի մեջ, ապա ի պատասխան՝ դու պետք է մնաս բարձր, չտրվես սադրանքների, լինես միաբան, լինես իմաստուն ու խոհեմ։ Չարիքը հաղթահարելու այլ ձև, այս պարագայում, ես առնվազն չեմ տեսնում․․․»: