«ԱՄՆ-ի Քոնգրեսի 89 անդամ դիմել է ԱՄՆ-ի Պետքարտուղարին` ապահովելու բռնի տեղահանված հայերի վերադարձը». Մանե Թանդիլյան

«Ապրելու երկիր» կուսակցության համահիմնադիր Մանե Թանդիլյանը գրել է. «ԱՄՆ-ի Քոնգրեսի 89 անդամ դիմել են ԱՄՆ-ի Պետքարտուղար Մարկո Ռուբիոյին՝ ապահովելու բռնի տեղահանված հայերի հավաքական, պաշտպանված և արժանապատիվ վերադարձն իրենց հայրենիք՝ Լեռնային Ղարաբաղ։
Քոնգրեսականները ներկայացրել են 2023թ. Արցախում տեղի ունեցած իրադարձությունները։
Խնդրանքը ներկայացվել է՝ որպես պատերազմի պատճառով տեղահանված ժողովուրդների վերադարձի իրավունքի ճանաչում, որը միջազգային իրավունքի հիմնարար սկզբունք է։
ԱՄՆ քոնգրեսականները ընդգծում և ողջունում են ՄԱԿ-ի Եկեղեցիների համաշխարհային խորհրդի հովանու ներքո անցկացված «Լեռնային Ղարաբաղի հայկական կրոնական, մշակութային և պատմական ժառանգության պահպանության միջազգային համաժողովի» վերջնական հայտարարությունը (2025թ․ մայիսի 27-28, Բեռն, Շվեյցարիա), որը կոչ էր անում կառավարություններին և միջազգային կառույցներին, մասնավորապես Շվեյցարիային՝ ձեռնարկել դիվանագիտական և իրավական քայլեր՝ կանխելու հայկական ժառանգության շարունակվող ոչնչացումը, աջակցելու հայ ժողովրդի վերադարձին և գործելու՝ Բաքվում պահվող հայ գերիների ազատման ուղղությամբ»։