«Իշխանությունը հենված է քարոզչական փուչիկների վրա»․ Րաֆֆի Ասլանյան

Փաստաբան Րաֆֆի Ասլանյանի ֆեյսբուքյան գրառումը. «Երևանի քաղաքապետարանը հայտարարել է մետրոյի «Սուրմալու» կայարանի նախագծային մրցույթ։ Կարծես «Աջափնյակ» կայարանը կառուցել, շահագործման են հանձնել, հասարակությունն արդեն օգտվում է, անցել են հաջորդին։ Սա պարզ ցույց է տալիս, որ Հայաստանում արդեն յոթ տարի իշխանությունը հենված է քարոզչական փուչիկների վրա, որոնք ամեն դեպքում պայթելու են, որքան էլ հասարակության մեջ զգալի թիվ կազմեն սահմանափակ ինտելեկտ ունեցող հայրենակիցները։ Տղերք, դուք այսքան տարի նույնիսկ ի վիճակի չեք եղել քաղաքի հեղեղատարները մաքրել, մի նորմալ շրջանցող տրանսպորտային հանգույց կառուցել (յոթ տարվա մեջ միակը՝ Հյուսիս-հարավի մաս կազմող՝ Կարմիր Բլուրից-ՀԱ թաղամաս տանող կամրջից հետո ճանապարհը վերջնական չեք ավարտել՝ Հաղթանակ թաղամասի մոտ տրանսպորտային կոլապս առաջացնելով և հեռու կանգնելով), բայց արդեն խոսում եք երևակայական մետրոյի երկու կայարանների մասին։ Հավատացեք, հասարակության մեջ հիմարներն այլևս գերակշռող թիվ չեն կազմում, նույնիսկ նրանք են հասկացել ամեն ինչ»։