«Վաղ թե ուշ թուրքական ցեղասպանական գործողությունները Եվրոպային էլ կհասնեն»․ Նաիրի Հոխիկյան
306
Կիրակի, 27 հուլիսի, 2025 թ., 12:24
Լրագրող, հանրային գործիչ Նաիրի Հոխիկյանի ֆեյսբուքյան գրառումը․ «Օրերս մեր գրասենյակ հյուրեր էին եկել եվրոպական մի քանի երկրներից՝ Ֆրանսիայից, Բելգիայից և Գերմանիայից։ Զրուցեցինք աշխարհաքաղաքական զարգացումներից և հայ-թուրքական (ադրբեջանական) հակամարտությունից։ Եվրոպացի գործընկերները ափսոսանք հայտնեցին, որ հայկական քաղաքակրթության բնօրրան Արցախը այդպես հանձնվեց Ադրբեջանին և հիմա հոշոտվում է։ Հարցրի՝ իսկ ինչո՞ւ Եվրոպան, այդ թվում հենց Բելգիան ու Ֆրանսիան նպաստեցին այդ հանձնմանը՝ 2022-ի հոկտեմբերին Պրահայում ողջունելով Նիկոլ Փաշինյանի կողմից Արցախը Ադրբեջանի կազմում ճանաչելու ստորագրմանը։ Պատասխանեցին, թե իրենց երկրները մեծ կախվածություն ունեն Թուրքիայից ու Ադրբեջանից։ Թուրքիայի դեպքում թուրքական մեծ համայնքներն են, Ադրբեջանի դեպքում' նավթն ու գազը։ Հարցրի՝ այսինքն նորմա՞լ է, որ ժողովուրդներ զոհաբերվեն հանուն սեփական շահի։ Այդ դեպքում ո՞ւր մնացին Եվրոպայի հռչակած մարդու իրավունքները և ազգային ինքնորոշման կարևորությունը։ Պատասխանեցին, թե ամեն ինչ իրավիճակից է կախված։ Նայած, թե երբ որն է ձեռնտու։ Ասացի՝ շատ լավ։ Դուք եք խոստովանում, որ թուրքական ներխուժման մեծ վտանգ կա, որ կախվածություն ունեք մեր թշնամուց։ Վաղ թե ուշ թուրքական ցեղասպանական գործողությունները Եվրոպային էլ կհասնեն, և այն ժամանակ Հայաստանը անտարբեր կնայի ու ափսոսանք կհայտնի, որ թուրքերը Եվրոպայում ցեղասպանություն են իրականացնում։ Բայց մենք էլ կարդարանանք, թե ամեն ինչ իրավիճակից է կախված, նայած, թե որն է ձեռնտու։ Հայ գործընկերներս ասում էին՝ շատ կոշտ էր ասածս, բայց ես կարծում եմ, որ իրականությունը պետք է ասել մարդկանց ճակատին, որպեսզի հասկանան, թե դիմացը միամիտ և տկար հայերը չեն։ Եվրոպացիների հետ հանդիպման ավարտին համագործակցության ճանապարհային քարտեզ գծեցինք՝ շոշափելի արդյունքներ ստանալու համար։ Այսինքն քննադատությունը դեռևս կամուրջներ այրել չի, հակառակը' փոխադարձ հարգանքով առաջ քայլելու հնարավորություն։ Նույնը վերաբերում է նաև Ռուսաստանի հետ մեր հարաբերություններին։ Երբ հավասարի ու գործընկերոջ դիրքերից խոսենք այլ երկրների հետ, կստանանք և ըմբռնում, և հարգանք, և համագործակցություն։ Այս գործում շատ մեծ անելիք ունեն Սփյուռքի՝ Հայկական Աշխարհի մեր եղբայրներն ու քույրերը, որոնք գրեթե բոլոր երկրներում կարևոր դիրքեր են զբաղեցնում և սպասում են մայր հայրենիքից ազդակների։ Մենք ունենք այդ ազդակների բանաձևերը»։
