ԵՄ-ն չի կարողանա 600 միլիարդ դոլար ներդնել ԱՄՆ-ի տնտեսությունում, ինչպես խոստացել էր. Politico

Եվրոմիությունը չի կարողանա կատարել ԱՄՆ-ի նախագահ Դոնալդ Թրամփին տված խոստումը՝ 600 միլիարդ դոլար ներդնել ԱՄՆ-ի տնտեսությունում: Այս մասին հաղորդում է եվրոպական Politico գործակալությունը՝ հղում անելով աղբյուրներին:

Նրանց տեղեկությունների համաձայն՝ բոլոր միջոցներն ԱՄՆ կգան ոչ թե պետական, այլ մասնավոր հատվածից, որի նկատմամբ Բրյուսելը որևէ լիազորություն չունի: «ԵՄ-ն՝ որպես պետական մարմին, չի կարող երաշխավորել դա: Ամեն ինչ կախված է մասնավոր ընկերությունների մտադրություններից»,- թերթին ասել է Եվրոհանձնաժողովի անանուն բարձրաստիճան պաշտոնյան:

Ենթադրվում է, որ 600 միլիարդ դոլարի չափը որոշվել է «տարբեր բիզնես ասոցիացիաների և ընկերությունների հետ մանրամասն քննարկումներից հետո»: Սակայն մասնավոր ընկերությունների հաշվին նման մակարդակի ներդրումներ ապահովելու գաղափարը քաղաքական գործիչների և վերլուծաբանների կողմից ընդունվել է սկեպտիկորեն: «Ժակ Դելոր» կենտրոնի փոխտնօրեն Նիլս Ռեդեկերը Politico-ին ասել է, որ ԵՄ-ն «չի կարող մասնավոր ընկերություններին ասել, թե որքան ներդրումներ կատարեն ԱՄՆ-ում»: