«Մենք կարիք ունենք գաղափարի, որը կտա մեր՝ հայ մարդու, Հայկական Հանրապետության կյանքի իմաստը». Տարոն Սիմոնյան

ԱԺ նախկին պատգամավոր, իրավաբան Տարոն Սիմոնյանի ֆեյսբուքյան գրառումը․ «Ունայնությունն է հետևանքը նրա, ինչ առաջարկվում է՝ որպես կյանք՝ առանց գաղափարի ու նպատակի։
Ազգը, պետությունը, հանրությունը, քաղաքացին, մարդը չեն կարող չունենալ նպատակ՝ այլ մարդկանց, սեփական ազգի ներկայացուցիչների հետ համատեղ ապրելու իմաստ, մի ինչ-որ գաղափարական հենք ու հորիզոն, որ նրանց կկտրի պարզապես կենսաբանան էակ լինելու՝ պարզապես բնազդները սնելու, սպառողի հեշտ կյանքից ու կտանի դեպի հոգևոր էակ լինելու՝ իրենցից վեհին ձգտելու, ընդհանուր աշխատանքին ու նպատակին ձուլվելու ու այդ ճանապարհին նորը ստեղծելու, արարելու առաքելությունը։
Վերջին տարիների հայրենազրկման, գաղափարական ու բարոյական գահավիժման քաղաքականությունը չի տանելու մեզ վտանգից հեռու ավելի ճոխ, հանգիստ ու երջանիկ կյանքի, եթե անգամ մի քանի անգամ ավելի շատ հաց ուտենք, ճանապարհորդենք, բնազդներին հագուրդ տանք, գույնզգույն նկարներ գցենք սոցիալական ցանցեր ու խոսենք հնարավոր խաղաղության մասին։ Դա միայն ավելացնելու է անհոգի մարմնում դատարկությունից տառապելու անդառնալիության զգացումը։
Առավել, քան քաղաքական, իրավական, տնտեսական, սոցիալական որևէ համակարգ, որի շուրջ կարող ենք տարիներով բանավիճել, մենք կարիք ունենք ԳԱՂԱՓԱՐԻ, որը կտա մեր՝ հայ մարդու, հայկական հանրության, ՀՀ քաղաքացու, Հայկական Հանրապետության, հայ ազգի կյանքի իմաստը, հանուն որի մենք պատրաստ կլինենք ապրել մեր մի բուռ ժամանակն ու փոխանցել էստաֆետը, իսկ եթե հաջողվի հասնել այն բանի գիտակցման, որ առանց դրա հնարավոր չլինի պատկերացնել կյանքը, ապա հայ ազգի ընթացն այս մոլորակի վրա երաշխավորված կլինի առնվազն ևս ոչ մեկ հազարամյակ։
Հ․Գ․ Իհարկե, սա նրա մասին չէ, որ թողնենք անվտանգային, իրավական, քաղաքական, տնտեսական, սոցիալական խնդիրների ու մարտահրավերների քննարկումները, որոնք անհրաժեշտ են։ Ինքս էլ ոչ հաճախ, բայց էլի հարցազրույցներ տալիս եմ իրավական թեմաներով։ Բայց առանցքայինն այն է, որ մեզանում առաջնային, ընդգծված, կենսական հիմքերը սասանող, ժամանակի մեջ հապաղում չհանդուրժող խնդիրը մարդու, հանրության, պետության, ազգի ԿՅԱՆՔԻՆ ԻՄԱՍՏ ՏՎՈՂ ԳԱՂԱՓԱՐԻ ԲԱՑԱԿԱՅՈՒԹՅՈՒՆՆ է, իսկ ավելի ճիշտ՝ ԴՐԱ ԳՈՅՈՒԹՅԱՆ ԴԵՄ ԱՆԽՆԱ ՊԱՅՔԱՐԸ»։