«Ահա այս «սկզբունքները» դարձան Արցախի դամբանականը». Նարեկ Գալստյան

Լրագրող, քաղաքագետ Նարեկ Գալստյանը ֆեյսբուքյան իր էջում գրել է․ «Ջրոցուն (այլ ոչ թե Տիրոջ Պայծառակերպման տոնին) տասնյակ հազարավոր մարդկանց մասնակցությունն իբրև սեփական քաղաքական հաջողություն գրանցող ՀՀ նիկոլականների առաջնորդը 2020 թ-ին այսպիսի «Մյունխենյան սկզբունքներ» էր մոգոնել՝ վերադառնալով Երևան Գերմանիայում Ալիևի հետ պատմական խայտառակ հրապարակային բանավեճից: Ստանալով 2019 թ-ին ԵԱՀԿ Մինսկի խմբի համանախագահներից վերջին առաջարկը՝ նա և իր արտգործնախարար Զոհրաբ Մնացականյանը (չպետք է մոռանալ իր մասին նույնպես) թաքցրեցին այն ժամանակ և թաքցնում են հիմա այս փաստաթղթերը, որոնց մերժումն ու այս ապուշագույն «սկզբունքների հրապարակումը» միջազգային հանրությանը հնարավորություն տվեց ձեռքերը լվալ ու Ալիևին հարձակվելու կանաչ լույս տալ:
Մի տեսե՛ք, թե ինչ պոռոտախոսություն կա երբեմնի ոչմիթիզականի գրածում՝ հրաժարվում է քննարկել ԼՂ շուրջ տարածքների ճակատագիրը, պահանջում, որ Արցախը դառնա բանակցային գործընթացի մաս, ճամարտակում, թե ԼՂ խնդիրը չունի ռազմական լուծում:
Ահա այս «սկզբունքները», որ Փաշինյանը հպարտորեն հրամցնում էր հպաաաաաարտ հայ ժողովրդին, դարձան Արցախի դամբանականը, նեկրոլոգը…
Արցախը կործանած, 150000 հայ մարդկանց փախստական, տնավեր դարձրած, Հայաստանում ատելության մթնոլորտ ու փոխադարձ թշնամանք սերմանած, մեր բոլոր սրբությունները ոտնահարած մեկը գլուխ է գովում, թե ջրոցուն շատ մարդ է մասնակցել: Նախանձելի ցինիզմ, ինչ խոսք»: