«Ժամանակակից ՀՀ-ի ամենամեծ խնդիրներից մեկը ռուսամետ գործիչների պակասն է». Հայկ Այվազյան

«Լույս» տեղեկատվական-վերլուծական կենտրոնի տնօրեն Հայկ Այվազյանի ֆեյսբուքյան գրառումը. «Մեծն Հովհաննես Թումանյանը ասել է, որ իր ընթացքով Ռուսաստանը ժողովուրդներ չի կործանում, այլ ազատագրում է։
Այստեղ ամենակարևորը ժամանակին հասկանալ Ռուսաստանի ընթացիկ ուղին, որպեսզի կարողանաս ժամանակին միանալ դրան և անցնել դժվար ժամանակները նվազագույն կորուստներով։
Նման մարդուն կարելի է անվանել ռուսամետ գործիչ, ով խորանում է, փորձում է հասկանալ այսօրվա Ռուսաստանի ընթացքը, ապագա իրադարձությունների հնարավոր զարգացումը, կարողանում է հարմարեցնել իր քաղաքական հայացքներն ու մոտեցումները Ռուսաստանի աշխարհաքաղաքական օրակարգին և այդ ամենում գտնում է Հայաստանի շահը։
Այս իմաստով, ժամանակակից Հայաստանի ամենամեծ խնդիրներից մեկը ռուսամետ հասարակական-քաղաքական գործիչների և ուժերի խիստ պակասն է։ Կարելի է ասել՝ նրանք գրեթե չկան Հայաստանում։
Կոնկրետ օրինակ՝
2020 թվականի պատերազմից հետո պարզ դարձավ, որ Լեռնային Ղարաբաղում ստատուս-քվոն պահպանել հնարավոր էր միայն 2020թ․ նոյեմբերի 9-ի հայտարարության միջոցով։ Արևմուտքի ցանկացած մասնակցություն այս գործընթացին, ցանկացած ձևով, անօգուտ և կործանարար էր։
Իսկ որտե՞ղ էին այն ռուսամետ ուժերը, որոնք պետք է աջակցեին նոյեմբերի 9-ի հայտարարությանը։
Վերջերս որոշ առանձին քաղաքական գործիչներ ուշացած գալիս են այդ մտքին, բայց դա ազդեցություն չի ունենում հանրային կարծիքի վրա, և արդեն հնարավոր չէ բան փոխել։
Նույնը կարելի է ասել Ռուսաստանի աշխարհաքաղաքական օրակարգի մասին։ Այն պարզապես գոյություն չունի Հայաստանի քաղաքական կյանքում, այն չի քննարկվում, այն հետաքրքիր չէ քաղաքականապես ակտիվ հատվածի համար, քանի որ չկան այն ուժերը, որոնք կներկայացնեն և առաջ կմղեն այդ օրակարգը։
Հայաստանը չի կարող գոյություն ունենալ, եթե չլինի ընդգծված ռուսամետ պետություն։
Այսօր սա ոչ պոպուլյար կարծիք է Հայաստանում, սակայն ժամանակի ընթացքում շատերը կգան դրան։ Ցավոք՝ ուշացած»: