Ադրբեջանն սպառնում է Ռուսաստանին

Ադրբեջանի արտաքին գործերի նախարարության մամուլի քարտուղար Այխան Հաջիզադեն արձագանքել է Ռուսաստանի նախագահի միջազգային մշակութային համագործակցության հարցերով հատուկ ներկայացուցիչ Միխայիլ Շվիդկոյի հայտարարություններին, որը Բաքվին մեղադրել էր «անբարյացակամ գործողության» մեջ՝ Ստեփանակերտում ծովանկարիչ և գրաֆիկական նկարիչ Հովհաննես Այվազովսկու հուշարձանի ապամոնտաժման համար։ «Պարոն Շվիդկոյի հայտարարությունները Ադրբեջանում ռուսական մշակույթի ենթադրյալ «չեղարկման» մասին ևս մեկ սուտն են։ Չնայած երկու երկրների միջև այս ոլորտում գոյություն ունեցող լուրջ անհավասարակշռությանը, Ադրբեջանում ոչ ոք չի չեղարկել ռուսական մշակույթը։ Այսպիսով, Ադրբեջանում կան ռուսական թատրոն, ռուսերենով ուսուցմամբ դպրոցներ, հրատարակություններ են հրատարակվում ռուսերենով, մինչդեռ Ռուսաստանում չկան թատրոններ, դպրոցներ, թերթեր և ամսագրեր ադրբեջաներենով։

Չնայած դրան, մենք հայտարարություններ չենք անում Ռուսաստանում ադրբեջանական մշակույթի «չեղարկման» մասին։ Սակայն, բարձրաստիճան ռուս պաշտոնյաները պետք է հասկանան, որ եթե իրենց կողմից հակաադրբեջանական գործողություններն ու հայտարարությունները շարունակվեն, ապա հնարավոր են այդ անհավասարակշռությունը վերացնելու միջոցառումներ։

Ցավալի է նաև, որ վերջերս Ադրբեջանի «ազատագրված տարածքներ», Շուշա (Շուշի-խմբ.) քաղաք կատարած այցի ժամանակ պարոն Շվիդկոյը, ծանոթանալով Նաթավանի, Ուզեյիր Հաջիբեյլիի, Բյուլբուլի և ադրբեջանական մշակույթի այլ գործիչների հուշարձանների նկատմամբ վանդալիզմի գործողություններին, ինչպես նաև Ադրբեջանի տարածքում հասցված ավերածություններին, համարձակություն չի գտել դատապարտելու այդ գործողությունները։

Այն փաստը, որ 2010 թվականին հրապարակված հոդվածում Ռուսաստանի Դաշնության պետական լրատվական գործակալություն ՏԱՍՍ-ի կողմից Խանքենդի քաղաքը «Ստեփանակերտ» անվանելը մեր երկրի տարածքային ամբողջականության նկատմամբ անհարգալից վերաբերմունք է և վիրավորական քայլ։

Այս անբարյացակամ քայլի կապակցությամբ մենք կցանկանայինք հիշեցնել ռուսական կողմին, որ Խանքենդի քաղաքը, որը գտնվում է Ադրբեջանի սկզբնական տարածքում և դարձել է 1923 թվականին ստեղծված Լեռնային Ղարաբաղի ինքնավար մարզի վարչական կենտրոնը, «Ստեփանակերտ» անվանափոխելը բոլշևիկ Ստեփան Շահումյանի պատվին, որը դաշնակների հետ միասին զանգվածային հաշվեհարդարներ էր իրականացրել ադրբեջանական ժողովրդի դեմ, վիրավորանք էր Ադրբեջանի նկատմամբ։

Մենք տեղեկացնում ենք ռուսական կողմին, որ ակնկալում ենք ադրբեջանական տեղանունների աղավաղման և մեր տարածքներում անջատողական խամաճիկային ռեժիմի կողմից օգտագործվող անվանումների օգտագործման դադարեցում։ Եթե նման դեպքերը կրկնվեն, Ադրբեջանը, առաջնորդվելով փոխադարձության սկզբունքով, կարող է սկսել Ռուսաստանի տարածքում գտնվող բազմաթիվ բնակավայրեր անվանել իրենց պատմական անուններով։

Մենք սպասում ենք ՏԱՍՍ լրատվական գործակալությունից ներողություն և համապատասխան ուղղումներ։ Հակառակ դեպքում, օրենքի համաձայն, կարող են ձեռնարկվել համապատասխան միջոցներ՝ ուղղված ՏԱՍՍ-ի գործունեությանն Ադրբեջանում», - ասվում է հայտարարության մեջ։