«ՀՀ նախագահը պրոպագանդում է Կառավարության քաղաքական օրակարգերը»․ Հարութ Ուլոյան

Հրապարակախոս Հարութ Ուլոյանի ֆեյսբուքյան գրառումը․ «Այն, որ ՀՀ նախագահի պաշտոնը զբաղեցնող անձի կողմից «Սյունիքի դարպասների» վերաբերյալ արտահայտված մտքերն ու ընտրված բառապաշարն ուղղակի խայտառակություն են, այստեղ երկրորդ կարծիք լինել չի կարող:
Բայց գլխավոր խնդիրը կայանում է նրանում, որ ՀՀ նախագահի պաշտոնը զբաղեցնող ցանկացած անձ սահմանադրորեն իրավունք չունի նման խոսույթներ ձևավորելու ու, ըստ էության, պրոպագանդելու գործադիրի՝ Կառավարության, տվյալ դեպքում՝ թՔՊ-ի քաղաքականությունը:
ՀՀ Սահմանադրությամբ՝ ՀՀ նախագահի գործառույթները սահմանափակված են Սահմանադրությամբ նախատեսված լիազորություններով: Իսկ այդ լիազորությունները սահմանում են, որ պաշտոնավորման ընթացքում ՀՀ նախագահը չի՛ կարող լինել կուսակցական և պարտավոր է լինել «անաչառ ու առաջնորդվել բացառապես համապետական և համազգային շահերով»: Ավելին, Սահմանադրությունը հստակ նշում է, որ ՀՀ նախագահի լիազորությունը ՀՀ Սահմանադրության պահպանմանը հետևելն է:
Սահմանադրությունում ոչ մի տեղ նշված չի, որ ՀՀ նախագահը պետք է իրականացնի կամ պրոպագանդի գործադիրի՝ Կառավարության առաջ քաշած քաղաքական օրակարգերը: Ոչ մի դրույթով չի սահմանվում, որ Կառավարության քաղաքական օրակարգերը «համապետական ու համազգային» շահեր են:
Ըստ այդմ, ՀՀ նախագահի պաշտոնը զբաղեցնող ներկայիս անձն ակնհայտորեն դուրս է եկել Սահմանադրությամբ նախատեսված իր լիազորությունների շրջանակից ու պրոպագանդում է Կառավարության, տվյալ դեպքում՝ թՔՊ-ի քաղաքական օրակագերը: Նա անաչառություն ու չեզոքություն չի՛ դրսևորում ու բացահայտորեն սպասարկում է կոնկրետ կուսակցության քաղաքական շահերը»։