ԱՄՆ-ն և Չինաստանը կարող են երկարաձգել սակագնային զինադադարը

ԱՄՆ-ի նախագահ Դոնալդ Թրամփը և նրա վարչակազմը, ամենայն հավանականությամբ, համաձայնության կգան Չինաստանի հետ և կերկարաձգեն մաքսային տուրքերի վերաբերյալ գործող համաձայնագրերը 90 օրով, հայտարարել է ԱՄՆ-ի առևտրի նախարար Հովարդ Լութնիկը։
«Կարծես թե նրանք [Թրամփը և ԱՄՆ բանակցային թիմը] համաձայնության կգան և կերկարաձգեն [համաձայնագրերը] ևս 90 օրով»,- ասել է նա Fox Business-ին տված հարցազրույցում՝ նշելով, որ այս հարցի վերաբերյալ վերջնական որոշումը Թրամփինն է։

Չինաստանի և ԱՄՆ-ի միջև երկկողմ առևտրային հարցերի շուրջ բանակցությունների հաջորդ փուլը տեղի է ունեցել հուլիսի 28-29-ին Ստոկհոլմում։ Միևնույն ժամանակ, կողմերը դեռևս համաձայնության չեն եկել լրացուցիչ ներմուծման տուրքերի կասեցման ժամկետը երկարաձգելու հարցում։ Չինացի բանակցողները հայտարարել են, որ երկարաձգման վերաբերյալ համաձայնություն է ձեռք բերվել, սակայն ԱՄՆ-ի ֆինանսների նախարար Սքոթ Բեսենթը պնդում է, որ բոլոր պայմանները նախ պետք է հաստատվեն Թրամփի կողմից։