«Սա՞ էր այն Հայաստանը, որի համար ժողովուրդը կանգնեց 2018-ին»․ Դավիթ Սանասարյան

«Ինքնիշխան Հայաստան» կուսակցության նախագահ Դավիթ Սանասարյանի գրառումը․ «Քաղաքական դաշտը կրկին ճեղքված է՝ ոգևորվածների և ոգևորողներին անիծողների միջև։ Բայց այս աղմուկի ու քաոսի մեջ կրկին բացակայում է ՀԱՅԿԱԿԱՆ ՕՐԱԿԱՐԳԸ։ Ես տեսնում եմ ամերիկյան շահը, տեսնում եմ թուրքական ու ադրբեջանական շահերը, բայց ո՞րն է հայկականը։ Ասում են՝ Հայաստանն էլ կօգտվի, բայց ինչով եք չափում, միգուցե ածանցյալ փշրանքներն են մեզ մնում։ Եթե նույնիսկ շահ կա, ինչքա՞նով է այն գերակա, և ինչքա՞նով է ստորադասվում պետության շահը։ Ամեն դեպքում՝ այն հանրային լուրջ քննարկման թեմա չի դարձել։
Բազում առանցքային հարցեր կային, որոնք պետք էր լուծել երկրի ներսում՝ հանրային ու քաղաքական դերակատարների մասնակցությամբ։ Դրանք պետք է սպառվեին քննարկումների միջոցով, և նոր միայն գնայինք «պատմական» ստորագրությունների։ Փոխարենը՝ գործարքները կնքվում են մութ պայմաններում, այն էլ՝ երբ մեր տեղեկատվական դաշտը մինչև երեկ ուշ երեկո սնվում էր բացառապես ադրբեջանական աղբյուրներից։
Եվ երբ բարձրացվում են ողջամիտ հարցեր՝ Մինսկի խմբի ապագայից մինչև ճանապարհների փոխադարձության սկզբունքները, պատասխանը ստանում ես մեկ նախադասությամբ՝ «5-րդ շարասյուն», «գործակալ» և այլն։ Այս և այլ մեդիա ֆիլտրերի հետևանքով Հայաստանում այլընտրանքային կարծիք արտահայտողները պետք է պատրաստ լինեն համակարգված ֆեյքագրոհի ու շահեր սպասարկող խմբերի հարձակումներին։
Ինձ մի հարց է տանջում. սա՞ էր ձեր երազանքը, սա՞ էր այն Հայաստանը, որի համար ժողովուրդը կանգնեց 2018-ին։ Եթե այո, ուրեմն դուք ոչ թե ժողովրդավարության, այլ դրա իմիտացիայի կրողն եք և այդ դիմակն օգտագործում եք միայն ձեր իշխանությունը երկարացնելու համար։
Հ.Գ. Ինձ իսկապես հետաքրքիր է, թե մեր քաղաքացիները այս ստորագրման մեջ ինչ են հասկանում «հայկական շահ» ասելով»։