«Ի՞նչ է նշանակում «անխոչընդոտ հաղորդակցություն»»․ Նիկոլ Փաշինյանի պարզաբանումը

Սպիտակ տանը կայացած ՀՀ վարչապետ Նիկոլ Փաշինյանի, ԱՄՆ նախագահ Դոնալդ Թրամփի և Ադրբեջանի Հանրապետության նախագահ Իլհամ Ալիևի եռակողմ հանդիպմանը ստորագրված համատեղ Հռչակագրի 3-րդ կետում գրված է․ «Մենք վերահաստատեցինք ներպետական, երկկողմ և միջազգային փոխադրումների համար երկու երկրների միջև հաղորդակցությունների բացման կարևորությունը՝ հիմնված պետությունների ինքնիշխանության, տարածքային ամբողջականության և իրավազորության հարգման վրա, տարածաշրջանում ու նրա հարևանությամբ խաղաղությունը, կայունությունն ու բարգավաճումը խթանելու նպատակով։ Այս ջանքերը կներառեն Ադրբեջանի Հանրապետության հիմնական մասի և Նախիջևանի Ինքնավար Հանրապետության միջև Հայաստանի Հանրապետության տարածքով անխոչընդոտ հաղորդակցությունը, Հայաստանի Հանրապետության համար միջազգային ու ներպետական հաղորդակցության փոխադարձ առավելություններով»։
Ասուլիսի ժամանակ Նիկոլ Փաշինյանը պարզաբանեց, թե ի՞նչ է նշանակում «անխոչընդոտ հաղորդակցություն»․ «Ո՞րն է անխոչընդոտ, որն այսօրվա փաստաթղթով վերացնում ենք։ Պատկերացրեք մի իրավիճակ․ Ադրբեջանի քաղաքացին գալիս ա իր անձնագրով Կոռնիձորի կամրջի մոտ, ասում ա՝ ես ուզում եմ գնամ Նախիջևան, հարգում եմ ՀՀ իրավազորությունը, պատրաստ եմ սահմանված վճարումներ անել, իսկ մենք թույլ չենք տալիս։ Նույնը, եթե ՀՀ քաղաքացուն թույլ չտան Նախիջևանով գնալ Մեղրի, ասեն՝ ոչ։ Այ խոչընդոտը դա է»,- ասաց Փաշինյանը