«Այս «ցըմփ»-երով շոուն որևիցե առարկայական օգուտ չի բերելու Հայաստանին»․ Նարեկ Գալստյան

Լրագրող, քաղաքագետ Նարեկ Գալստյանի ֆեյսբուքյան գրառումը․ «Արցախը հանձնած, Արցախը հայաթափած, Հայաստանը աշխարհաքաղաքական բորշչի մեջ խրած, մեր ժողովրդի ինքնութենական բոլոր արժեքները ոտնահարած կոլաբորացիոնիստական ռեժիմի ներկայացուցիչներն այնպես են մուննաթ գալիս, թե դուք, դուք պատերազմ եք ուզում, բայց լինելու է խաղաղություն, կարծես Ցեղասպանությունից հետո ամենասարսափելի պատուհասած պատերազմը, դրան հաջորդող օկուպացիաներն իրենց իշխանության օրոք չեն եղել:
Իսկ իրականում ես չեմ հավատում, որ այս «ցըմփ»-երով շոուն որևիցե առարկայական օգուտ է բերելու Հայաստանին կամ տարածաշրջանին: Ինքզինքը Չեմբեռլենի տեղ դրած այս անձնավորությունը լավ պետք է հիշի, թե ինչպես ավարտվեցին Հիտլերի հետ խաղաղության հասնելու բրիտանա-ֆրանսիական ստորաքարշ փորձերը՝ Երկրորդ աշխարհամարտով: Մեկը Չեխոսլովակիան մատաղ արեց հանուն «խաղաղության» ու ստացավ աշխարհի պատմության ամենադաժան պատերազմը, մյուսը՝ Արցախը, իսկ հիմա նաև, որքան էլ որ սարսափելի է հնչում, Սյունիքը:
Ընդ որում, Սյունիքը մատաղ անել է նաև նշանակում այն մտցնել աշխարհաքաղաքական բորշչի մեջ, որի արձագանքներն արդեն լսվում են Ռուսաստանից, բայց հատկապես մեր հարավային հարևան Իրանից:
Հայաստանում այս ամենից կարճաժամկետ օգուտ միայն կարող են ստանալ կոլաբորացիոնիստական ռեժիմի ներկայացուցիչները, որոնք առաջիկա ընտրություններին ուղղակի շանտաժ են անելու ժողովրդին պատերազմով, եթե իրենք չվերընտրվեն: Այդ ճանապարհին, ինչպես և առիթ ունեցել եմ գրելու, ստանալու են ամերիկյան աջակցություն ու ադրբեջանական «դամ պահելը», ուստի ներքաղաքական եղած ռեպրեսիաներն առաջիկայում ուղղակի մանկական անմեղ հեքիաթներ են հիշեցնելու:
Հնարավո՞ր է, արդյոք, այս վակխանալիայի դիմացն առնել: Այս պահին ընդդիմության տարբեր թևերի ու ունեցած ռեսուրսների պարագայում՝ ոչ: Ոչ մեկ չունի հստակ ստրատեգիա, իրավիճակի գնահատական, իսկ շատերն էլ, իմ տպավորությամբ, մտածում են, որ տեղի է ունենում անխուսափելին, պետք է լռել ու սպասել:
Եթե իրադարձությունների այս ընթացքը պահպանվի, ապա ունենալու ենք կոլաբորացիոնիստական ռեժիմի վերարտադրություն ու ևս մի հինգ տարի «անձնուրաց պայքար» դրա դեմ, որն ունենալու է զրո էֆեկտիվություն»: