«Հայաստանը փոխադարձ առավելությամբ կապ է ստանում նախ՝ ինքն իր հետ, ապա նաև երրորդ երկրների հետ»․ Ռուբեն Ռուբինյան

«Ինչպես որ Ադրբեջանն է կապ ստանում Նախիջևանի հետ, այդ նույն փոխադարձ առավելություններով Հայաստանը կապ է ստանում նախ՝ ինքն իր հետ, որովհետև, օրինակ, Կապանը և Մեղրին երկաթուղային կապ չունեն Երևանի հետ՝ Սյունիքով և Վայոց ձորով, դա սովետական ժամանակաշրջանում եղել է Նախիջևանով։ Ինչպես նաև Հայաստանը ստանում է կապ երրորդ երկրների հետ»,- այս մասին Հանրայինի հետ հարցազրույցում նշեց ԱԺ փոխնախագահ Ռուբեն Ռուբինյանը՝ անդրադառնալով երեկ Վաշինգթոնում ՀՀ-ի և Ադրբեջանի միջև կնքված համաձայնագրին։

«Երեկ թիվ մեկ քննադատությունը հետևյալն էր․ ասում էին՝ մենք Ադրբեջանին տալիս ենք տրանսպորտային կապ, բայց մենք մնում ենք շրջափակման մեջ, ՀՀ-ի համար ոչինչ չի բացվում․․․ Սուտ է դա։ Պետք է բացել երեկ ստորագրված հռչակագրի տեքստը և հասկանալ, որ Հայաստանի համար տրանսպորտային կապը՝ Ադրբեջանի տարածքով, բացվելու է»։