«Վաշինգթոնի «Խաղաղության գործարքը» ընդամենը փոխելու է մարտահրավերների բնույթը». Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը. «Վաշինգտոնի «Խաղաղության գործարքը» չի բերելու խաղաղություն․ այն ընդամենը փոխելու է մարտահրավերների բնույթը։
Պատրաստվենք «պատերազմի» անդուլ ու կազմակերպված աշխատանքով, ազգային կարողությունների այնպիսի համակարգի ստեղծմամբ, որը կպահպանի և կպաշտպանի Հայաստանի ինքնիշխանությունն ու անվտանգությունը ցանկացած պայմաններում։
Հայաստանի ապագան պիտի կառուցվի վերտիկալ արդիականացման հենքի վրա՝ տեխնոլոգիական կատարելագործում, տնտեսական աճ և արտադրական, էներգետիկական, հաղորդակցային ու տիեզերական ենթակառուցվածքների ռազմավարական զարգացում։
Հայաստանը պետք է արձակի սեփական կապի և հեռազգա դիտողական արբանյակները, հասնի լիարժեք էներգետիկ ինքնաբավության, կառուցի ամենաժամանակակից ճանապարհներն ու հաղորդակցման միջոցները, ստեղծի գիտության, տնտեսության, արտադրության և պետական կառավարման ամբողջական, փոխկապակցված շղթա։
Պարտավոր ենք անմիջապես գործել՝ անկախ նրանից խաղաղություն է, թե պատերազմ։ Պետության ճակատագիրը երաշխավորվում է ոչ թե կամ ոչ միայն պայմանագրերով, այլ սեփական ուժով, մտքով և կամքով»: