«Արցախի հարցի և մեր ժողովրդի իրավունքների ջնջումը չի կարող կոչվել խաղաղություն». Մետաքսե Հակոբյան

Արցախի ԱԺ պատգամավոր Մետաքսե Հակոբյանի ֆեյսբուքյան գրառումը. «Արցախի հողը ու Հայաստանի անվտանգությունը սակարկման ենթակա չեն, խաղաղությունն էլ հանձնելով ու հանձնվելով ձեռք չես բերի…
Նախաստորագրված «խաղաղության» պայմանագիրը՝ այս տեսքով, ոչ թե ապահովում է արդար խաղաղություն, այլ ամրագրում է պարտության հետևանքները։ Խաղաղությունը չի կարող հիմնվել միայն փաստաթղթի ստորագրման վրա։ Այն պետք է կառուցված լինի արդարության, փոխադարձ վստահության և անվտանգության հստակ երաշխիքների հիման վրա։ ԱՄՆ-ում կազմված տեքստում այդ երաշխիքները բացակայում են։
Փաստաթուղթը ճանաչում է Ադրբեջանի տարածքային ամբողջականությունը՝ լռելով Արցախի ու բռնի տեղահանված հայերի մասին, զրկելով Հայաստանին միջազգային ատյաններում արդարության հասնելու իրավունքից։
Արցախի հարցի և մեր ժողովրդի իրավունքների ջնջումը չի կարող կոչվել խաղաղություն։
Մի փաստաթուղթ, որը սահմանափակում է մեր պաշտպանունակությունը, չի կարող ծառայել հայ ժողովրդի շահերին։
Հիշեցում. Նիկոլն ասում էր ցանկացած որոշիչ քայլ քննարկելու է ժողովրդի հետ, իսկ ժողովուրդը հերթական անգամ կանգնեց կայացած փաստի առաջ, քանզի սա քննարկում չէ, այլ անձի որոշում։ Այդ անձի որոշումներին հակառակվողները, ինչպես նաև Արցախի Ազգային Ժողովի պատգամավոր Դավիթ Գալստյանը, բանտերում են, հալածվում են բոլոր հնարավոր և անհնար միջոցներով, և քանի դեռ Հայաստանը ապազգային իշխանություններն են օկուպացրել, Հայի ապագան իր ձեռքում չէ։
Բայց նույնիսկ սա վերջակետ չէ…Որևէ ստորագրություն չի կարող ջնջել մեր պատմական և իրավական իրավունքները»: