«Ադրբեջանը սա համարելու է խրախուսանք և շարունակելու է նոր հանցագործություններ իրականացնել հայերի հանդեպ»․ Արտակ Բեգլարյան

«Վաշինգթոնյան հռչակագիրը և դրա շրջանակներում ստորագրված փաստաթղթերը ակնհայտորեն չեն կարող կայուն, արդար ու արժանապատիվ խաղաղություն ապահովել, որովհետև դա ուղղակի Արցախի ժողովրդի իրավունքների ու արյան հաշվին է»,- այս մասին «Նյուզ»-ի հետ զրույցում նշել է Արցախի նախկին ՄԻՊ Արտակ Բեգլարյանը։

«Բացի դրանից՝ Ադրբեջանը, որը միջազգային բազմաթիվ հանցագործություններ կատարած կողմ է, որևէ ձևով կաշկանդված չի զգում իրեն, այսինքն՝ մի կողմից խաղաղությունը համապարփակ ու ներառական չէ, չի ներառում ու չի կարգավորում հակամարտության բոլոր հիմնական հարցերը, մյուս կողմից՝ այս հռչակագիրը չի վերացնում հակամարտության պատճառները՝ այդ թվում Ադրբեջանի հայատյացության համակարգը»,- նշեց Բեգլարյանը՝ ընդգծելով, որ սա բերելու է նրան, որ նախ՝ հայ ժողովուրդը չի հանդուրժելու այս իրավիճակը, երկրորդ՝ Ադրբեջանի իշխանություններն ու ժողովուրդը սա համարելու են որպես հաղթանակ կամ խրախուսանք և շարունակելու են նոր հանցագործություններ ու ոտնձգություններ իրականացնել հայերի ու Հայաստանի հանդեպ։