«Սխալ է կառավարությանն անվստահություն հայտնելու գործընթացը և ընտրությունները հակադրելը». Կարեն Վրթանեսյան

Ռազմական փորձագետ Կարեն Վրթանեսյանի ֆեյսբուքյան գրառումը․ «Սխալ է կառավարությանը անվստահություն հայտնելու գործընթացը և ընտրությունները հակադրելը։
Ինչպես անիմաստ է հակադրելը բոքսն ու ըմբշամարտը, որովհետև երկուսն էլ ունեն իրենց ուժեղ և թույլ կողմերը, ավելի արդյունավետ կիրառման ոլորտները։
Հանրային բանավեճը պետք է լիներ այն մասին, թե ինչպես կարելի է առավել արդյունավետ աշխատել երկու ուղղությամբ էլ։
ԿԱՐԵՎՈՐ ԵՐԿՈՒ ՆՈԹ
ՆՈԹ №1. թե՛ անվստահություն հայտնելով , թե՛ ընտրություններով նիկոլական ռեժիմը հեռացնելու համար անհրաժեշտ է հանրային հնարավորինս ամենալայն աջակցություն՝ ազգային բոլոր ռեսուրսների մոբիլիզացիա։ Այս պահին ես ոչ միայն չեմ տեսնում այդ ուղղությամբ որևէ խորքային ու հետևողական աշխատանք, այլև հակառակը... Կրկնում եմ, քննարկումը պետք է լիներ ոչ թե «ո՞ր փայտիկն է կախարդական», այլ «ԻՆՉՊԵՍ առավել արդյունավետ օգտագործել եղած հնարավորությունները»։
ՆՈԹ №2. անվստահություն հայտնելու մեխանիզմը, նույնիսկ եթե հաջողության չի հասնում, ունի շատ կարևոր մի հատկություն. այն անդադար հիշեցում է ՔՊ-ական պատգամավորներին, որ իրականում իրենք այնքան էլ անզոր-անլեզու-հլու-հնազանդ արարածներ չեն, որքան որ Նիկոլը փորձում է իրենց համոզել։
Այդ գիտակցումը, նախ՝ ահավոր նյարդայնացնող է Նիկոլի համար, երկրորդը՝ բարձրացնում է իր իշխելու գինը։ Եթե կա թեկուզ մարմանդ գործընթաց, որին ցանկացած պահին տեսականորեն կարող է միանալ իշխանական «նեղացած» պատգամավորը, դա արդեն խնդիր է Նիկոլի համար։
* * *
Ընդհանրապես, արդեն 7 տարի է, ինչ հանրային դիսկուրսը մտցված է պարզունակ՝ «սև-սպիտակ», կաղապարների մեջ, ինչը մեզ ստիպում է խաղալ պոպուլիստի պարտադրած խաղի կանոններով պոպուլիստի ձևավորած իրականության մեջ, ինչը նշանակում է, որ մենք մշտապես պարտվելու ենք։
Եթե ուզում ենք երբևէ վերականգնել ազգային պետությունը, պետք է դուրս գանք մեզ պարտադրած այս սև-սպիտակ միֆոլոգիայի թակարդից»: