Եվրոպան կշարունակի ճնշում գործադրել Ռուսաստանի վրա

ԵՄ երկրները համաձայնել են շարունակել ճնշում գործադրել Ռուսաստանի վրա՝ ռուս-ուկրաինական պատերազմի լուծումը մոտեցնելու համար։

Եվրոպական խորհրդի ղեկավար Անտոնիո Կոստան այս մասին հայտարարել է այսօր կայացած՝ ԵՄ առաջնորդների առցանց գագաթնաժողովից հետո, որտեղ քննարկվել են Սպիտակ տանը Ուկրաինայի վերաբերյալ երեկվա բանակցությունների արդյունքները։

«Եվրոպական խորհրդի անդամների հետ մեր քննարկումից անմիջապես հետո ես հեռախոսազրույց ունեցա նախագահ Զելենսկու հետ», - գրել է Անտոնիո Կոստան X սոցիալական ցանցում։ «Ես ընդգծեցի ԵՄ-ի միասնությունը և շարունակական աջակցությունը Ուկրաինային, ինչպես նաև մեր հանձնառությունը՝ շարունակել ճնշում գործադրել Ռուսաստանի վրա»։

Եվրոպական խորհրդի ղեկավարը նաև ընդգծել է, որ կողմերը Միացյալ Նահանգների հետ համատեղ կաշխատեն Ուկրաինայի համար կոնկրետ և էական անվտանգության երաշխիքների շուրջ։